Pranë aeroportit Leipzig-Halle është zbuluar një tjetër dron, së bashku me një pajisje shpërthyese të kategorisë ushtarake. Zbulimi vjen pas ngjarjes së 4 gushtit, kur në aeroport u gjet një dron me eksplozivë dhe një avion transporti i DHL u përplas me një objekt të dyshimtë.
Të lidhura
None found
Rrjetet NDR dhe WDR, si edhe gazeta “Süddeutsche Zeitung”, raportojnë se droni i tretë u gjet më 14 gusht në Kampelsketal, në një zonë fushore pranë krahut perëndimor të aeroportit. Sipas dyshimeve të autoriteteve, ai mund të jetë përdorur për një sulm ndaj avionëve ukrainas të transportit të mallrave, por besohet se ka dalë jashtë funksionit.
Në të njëjtën zonë u gjetën edhe afërsisht 50 gramë Hexogen, i njohur gjithashtu si T4. Bëhet fjalë për një material me fuqi të lartë shpërthyese, i përdorur kryesisht në fushën ushtarake.
Rasti i parë u regjistrua më 4 gusht, kur një dron me eksplozivë u zbulua mes avionëve ukrainas të mallrave në aeroportin Leipzig-Halle. Detonatori i pajisjes ishte dëmtuar dhe dyshohet se pikërisht kjo e pengoi aktivizimin e shpërthimit.
Gjatë së njëjtës natë, një avion mallrash i DHL u përplas me një objekt të paidentifikuar, i cili po lëvizte me një shpejtësi prej disa qindra kilometrash në orë. Avioni pësoi dëme të kufizuara, ndërsa kontrollet e kryera më pas nuk zbuluan as dronin dhe as ndonjë fragment të tij. “Der Spiegel” shkruan se mbetet e paqartë nëse objekti ishte një dron apo, për shembull, një zog.
Autoritetet gjetën gjithashtu pranë pistës, në fshatin e braktisur Kursdorf, një pajisje teknike që mund të ketë shërbyer për drejtimin ose kontrollin e dronëve.
Deri tani nuk dihet ende se si ishte organizuar sulmi dhe kush mund të jetë autori i tij.
Zyra e Prokurorit Federal e ka përshkruar ngjarjen si “një sulm serioz ndaj infrastrukturës së transportit dhe logjistikës së Gjermanisë”. Ministri Federal i Brendshëm Alexander Dobrid e cilësoi atë si një “skenar sulmi hibrid”, duke lënë të hapur edhe mundësinë e përfshirjes së forcave të huaja.
Burime të sigurisë dyshojnë se në planifikim mund të kenë marrë pjesë shërbimet ruse të inteligjencës. Moska i ka hedhur poshtë të gjitha këto akuza.
