Spanja ka shpallur tre ditë zie kombëtare pas përplasjes së rëndë hekurudhore, ku të paktën 68 persona humbën jetën dhe dhjetëra të tjerë u plagosën. Ngjarja është cilësuar si një prej aksidenteve më të rënda hekurudhore në historinë moderne të Evropës.
Shërbimet e emergjencës vijuan punën gjatë gjithë natës, të ndihmuara nga projektorë të fuqishëm, për të prerë pjesët metalike të vagonëve dhe për të nxjerrë viktimat. Autoritetet thanë se disa prej të vdekurve ende nuk janë identifikuar.
Të lidhura
None found
Aksidenti ndodhi të mërkurën në mëngjes, kur një tren që po udhëtonte nga Madridi drejt Seviljes u përplas me një tjetër që ishte ndalur në shina. Hetuesit po përpiqen të përcaktojnë rrethanat dhe shkaqet e përplasjes.
Kryeministri spanjoll Pedro Sanchez deklaroi se “e gjithë Spanja është në zi”. Ai tha se shumë jetë janë shkatërruar, familje janë ndarë dhe dhimbja është e jashtëzakonshme.
Sipas Ministrisë së Brendshme, në vendngjarje janë angazhuar qindra efektivë dhe punonjës të shërbimeve të emergjencës. Për kërkimin e viktimave dhe heqjen e rrënojave po përdoren edhe dronë e helikopterë.
Treni i kompanisë private Iryo, me 147 pasagjerë në bord, ishte ndalur në shina për shkak të një defekti kompjuterik, bëri të ditur ministri spanjoll i Transportit, Oscar Puente.
Sipas ministrit, kur sistemi pëson defekt, kontrolli i lëvizjes kalon te një qendër që vepron 24 orë në Madrid. Megjithatë, kjo qendër mori një vendim të cilin Puente e përshkroi si “të pashpjegueshëm”, duke u dhënë trenave udhëzim të vazhdonin pa kufizime shpejtësie.
Regjistrimet audio të bisedave mes kontrollorëve hekurudhorë në Madrid dhe drejtuesve të trenave duket se tregojnë se një tren u lejua të vazhdonte rrugën, edhe pse një tjetër përpara tij kishte mbetur i ndalur.
Kompania Iryo tha se treni i saj u godit nga pas nga një tren i kompanisë shtetërore Renfe, i cili kishte 397 pasagjerë. Përplasja ishte aq e fuqishme sa disa vagonë përfunduan në një pjerrësi anësore të hekurudhës.
Dëshmitarët treguan për skena tronditëse brenda trenave: pasagjerë të gjakosur, njerëz të bllokuar në sedilje, vagonë të mbushur me tym dhe një prej tyre që u përfshi nga flakët.
Pas ngjarjes, familjarët vijuan gjatë natës të kërkonin të dhëna për personat që ndodheshin në dy trenat. Garda Civile spanjolle hapi zyra në Madrid, Toledo, Sevilje dhe Kordobë për të regjistruar denoncimet për të zhdukurit.
“Prioriteti kryesor është identifikimi i personave të zhdukur dhe marrja e mostrave të ADN-së, në mënyrë që të identifikohen familjarët e tyre”, njoftoi Garda Civile në një postim në rrjetin social X.
Në Toledo, pranë vendit të aksidentit, banorët mbajtën një minutë heshtje për viktimat. Në Bruksel, flamujt e Bashkimit Evropian u ulën në gjysmështizë në shenjë solidariteti me Spanjën gjatë ditëve të zisë.
Kryeministri Sanchez tha se është e papranueshme që Spanja të përballet me dy aksidente të rënda hekurudhore brenda të njëjtit vit. Në janar, një përplasje tjetër pranë Kordobës shkaktoi vdekjen e 46 personave. Edhe ajo ngjarje ndodhi në të njëjtën linjë hekurudhore, por më në jug.
Shumica e partive politike pezulluan fushatat për zgjedhjet e ardhshme pas tragjedisë. Partia e ekstremit të djathtë Vox ishte përjashtimi. Kreu i saj, Santiago Abascal, tha se forca politike nuk do të merrte pjesë në atë që ai e quajti përpjekje për të përdorur zinë si mënyrë për të mbyllur debatet mbi kritikat ndaj infrastrukturës hekurudhore.
Rreth 1,500 persona u mblodhën gjatë natës përpara Ministrisë së Transportit në Madrid, sipas transmetuesit spanjoll TVE. Protestuesit kërkuan kryesisht dorëheqjen e kryeministrit Sanchez dhe ministrit Puente.
Policia përdori gaz lotsjellës për të shpërndarë turmën, pasi disa pjesëmarrës hodhën shishe dhe flakadanë. Sipas raportimeve, nga protestat nuk pati të plagosur apo të arrestuar.
Drejtuesit e trenave pritet të zhvillojnë të enjten grevën e paralajmëruar. Sindikata spanjolle e drejtuesve të trenave, Semaf, tha se protesta do të mbahet “në mbrojtje të sigurisë hekurudhore”.
Kreu i Partisë Popullore, Alberto Nunez Feijoo, deklaroi se Spanja ka të drejtë të marrë vesh se çfarë po ndodh me infrastrukturën e saj.
Aksidenti i së mërkurës është më i rëndi i regjistruar në Spanjë që prej vitit 2013, kur 80 persona humbën jetën në një përplasje hekurudhore në periferi të Santiago de Compostela, në veriperëndim të vendit.
