Autoritetet italiane kanë nisur hetimet për një vjedhje të pazakontë në Romë, ku nga apartamenti i historianes së artit dhe producentes së filmave Donella Bossi Pucci dyshohet se janë marrë sende me vlerë rreth 700,000 euro.
Të lidhura
None found
Ngjarja besohet se ka ndodhur më 15 gusht, në një periudhë kur zona ishte e qetë për shkak të festave. Pucci e zbuloi grabitjen sapo u kthye nga pushimet, madje përpara se të hynte në apartament kuptoi se diçka nuk ishte në rregull.
Sipas të dhënave paraprake të hetuesve, hajdutët kanë vepruar me shpejtësi dhe në mënyrë të saktë, duke shmangur dëmtimet e mëdha në banesë. Ata dyshohet se kanë marrë dy kasaforta, brenda të cilave ndodheshin bizhuteri, objekte me vlerë dhe vepra arti pjesë e koleksionit personal të pronares.
Policia e Nëndrejtoratit të Sigurisë së Romës po shqyrton edhe mundësinë që grabitësit të kenë pasur ndihmën e një personi të njohur me zakonet e pronares dhe me informacionet mbi pasurinë që ruhej në apartament.
Një nga elementet që ka befasuar më shumë autoritetet është mungesa e shenjave të dukshme të dhunimit. Alarmi i banesës mendohet të jetë çaktivizuar ose manipuluar, ndërsa e gjithë grabitja besohet se është kryer brenda rreth 15 minutash.
Për të zbardhur ngjarjen, hetuesit po shqyrtojnë regjistrimet e kamerave të sigurisë në zonën përreth. Synimi është identifikimi i lëvizjeve të dyshimta dhe i automjeteve që mund të jenë përdorur nga ndonjë bashkëpunëtor i mundshëm jashtë ndërtesës.
Ndërkohë, janë marrë në pyetje dhe po verifikohen punonjësit, bashkëpunëtorët e pronares dhe portieri i pallatit. Laboratorët mjeko-ligjorë po analizojnë gjithashtu ambientet për gjurmë gishtash dhe prova të tjera që mund të ndihmojnë në identifikimin e autorëve.
