Një avion privat u detyrua të kryente një ulje emergjente të martën pasdite, më 18 gusht, në aeroportin Akron-Canton të Ohios, pasi ingranazhi i rrotës së përparme pësoi defekt dhe nuk funksiononte më.
Bëhej fjalë për një avion Cessna Citation të kompanisë NetJets, i cili ishte nisur nga Aeroporti Ndërkombëtar Washington Dulles. Problemi u shfaq gjatë fluturimit, kur mekanizmi i rrotës së përparme të uljes nuk u hap siç duhej.
Të lidhura
None found
Regjistrimet e bëra në aeroport tregojnë se rrotat e pasme prekën pistën ndërsa piloti mbajti hundën e avionit të ngritur. Kjo manovër e pengoi pjesën e përparme të avionit të përplasej me pistën dhe shmangu një aksident të mundshëm.
Zjarrfikësit dhe dëshmitarët thanë se, përpara uljes, piloti fluturoi disa herë mbi aeroport në përpjekje për të zgjidhur problemin dhe për të aktivizuar ingranazhin e uljes.
Një pilot me përvojë, i cili ndodhej pranë aeroportit dhe filmoi ngjarjen, deklaroi se kolegu i tij zbatoi procedurat e parashikuara për raste emergjente.
“Bëri gjithçka që ishte e mundur. Siç mund ta shihni në video, ai bëri një punë të shkëlqyer”, u shpreh ai.
Avioni ndaloi në mënyrë të sigurt në pistë, ndërsa automjetet e zjarrfikësve dhe ekipet e emergjencës së aeroportit mbërritën menjëherë në vendngjarje.
Ngjarja nuk shkaktoi pasoja të rënda. Reagimi dhe manovra e pilotit gjatë uljes bënë të mundur shmangien e një situate që mund të kishte përfunduar shumë më keq.
