Shahram Sadeghi është ekzekutuar në Iran pasi ishte shpallur fajtor dhe dënuar me vdekje për sulmin ndaj forcave të policisë gjatë protestave masive antiqeveritare të zhvilluara në janar. Lajmi u bë i ditur nga agjencia e lajmeve të gjyqësorit iranian.
Të lidhura
None found
“Sahram Sadeghi, i dënuar me vdekje për veprim në favor të regjimit sionist dhe Shteteve të Bashkuara, u ekzekutua këtë mëngjes”, raportoi Mizan.
Sipas të njëjtit burim, më 8 janar, në Karaj, në perëndim të Teheranit, Sadeghi përdori automjetin e tij për të goditur oficerët e policisë, duke plagosur shtatë prej tyre.
Numri i ekzekutimeve në Iran është rritur që prej nisjes së luftës pas sulmit të Shteteve të Bashkuara dhe Izraelit ndaj vendit, më 28 shkurt. Mes personave të ekzekutuar ka pasur edhe individë të dënuar për pjesëmarrje në protesta.
Protestat nisën në fund të dhjetorit, të nxitura nga shtrenjtimi i kostos së jetesës, dhe më pas u shndërruan në tubime të mëdha kundër qeverisë. Kulmi i tyre u regjistrua më 8 dhe 9 janar.
Autoritetet iraniane kanë deklaruar se mbi 3,000 persona kanë humbur jetën, ndërsa përgjegjësinë për dhunën ia kanë atribuar “akteve terroriste”, të cilat, sipas tyre, janë organizuar nga Shtetet e Bashkuara dhe Izraeli.
Ndërkohë, organizatat joqeveritare me bazë jashtë Iranit raportojnë për një goditje brutale, me mijëra viktima. Sipas Iran Human Rights dhe Ensemble contre la peine de mort (ECPM), gjatë vitit 2025 autoritetet iraniane ekzekutuan të paktën 1,639 persona, shifra më e lartë e regjistruar që prej vitit 1989.
Organizatat për të drejtat e njeriut, mes tyre Amnesty International, thonë se Irani renditet i dyti në botë për numrin e ekzekutimeve, pas Kinës.
