Kosova ka deklaruar se është e gatshme t’u vijë në ndihmë Shqipërisë dhe Malit të Zi, ku vatra zjarri janë përhapur në zona të ndryshme. Njoftimi u bë nga ministri në detyrë i Mbrojtjes, Ejup Maqedonci.
Ai bëri të ditur se ua ka komunikuar ministrave të Mbrojtjes të Shqipërisë dhe Malit të Zi gatishmërinë e Ministrisë së Mbrojtjes së Kosovës për të kontribuar me kapacitetet që vendi ka në dispozicion.
Të lidhura
None found
“Kosova është e gatshme të kontribuojë në mbështetje të autoriteteve përkatëse, nëse një ndihmë e tillë vlerësohet e nevojshme, duke vënë në dispozicion kapacitetet tona për përballimin e situatës së krijuar nga zjarret. Në momente të tilla solidariteti dhe bashkëpunimi marrin një rëndësi të veçantë. Ministria e Mbrojtjes, Forca e Sigurisë së Kosovës dhe institucionet tjera të Republikës mbeten të gatshme të ofrojnë mbështetje dhe të kontribuojnë aty ku kapacitetet tona mund të jenë të dobishme”, deklaroi Maqedonci.
