Bota e muzikës elektronike franceze dhe ajo ndërkombëtare është përfshirë nga një valë pikëllimi pas ndarjes nga jeta të Vincent Belorgey, i njohur gjerësisht si DJ dhe producenti Kavinsky, në moshën 50-vjeçare.
Prokuroria e Parisit konfirmoi se trupi i pajetë i artistit u zbulua në rezidencën e tij të martën. Autoritetet kanë hapur një procedim hetimor për të zbardhur rrethanat e sakta të vdekjes, teksa raportohet se efektivët e parë të policisë që shkuan në vendngjarje nuk evidentuan asnjë shenjë që të tregonte për një vepër penale.
Të lidhura
None found
Kavinsky arriti famën ndërkombëtare falë këngës së tij “Nightcall” të vitit 2010, një bashkëpunim me Guy-Manuel de Homem-Christo nga grupi legjendar Daft Punk. Kjo melodi shpërtheu në sukses planetar pasi u përzgjodh si pjesë e kolonës zanore të filmit “Drive” të vitit 2011, me protagonist Ryan Gosling, duke u shndërruar në një himn të zhanrit synthwave dhe muzikës elektronike.
Trashëgimia e tij artistike përfshin gjithashtu një paraqitje madhështore në ceremoninë përmbyllëse të Lojërave Olimpike të Parisit 2024, ku kontribuoi në programin e pasur muzikor të spektaklit.
Prania e tij në skenë ishte e rregullt dhe energjike, me dy albume të publikuara në diskografinë e tij: “OutRun” në vitin 2013 dhe “Reborn” në 2022. Ironia e fatit bën që ai ishte i konfirmuar për të performuar të shtunën, më 8 gusht, në festivalin e muzikës elektronike “Gärten on the Beach” në Deauville, një angazhim që tashmë mbeti i parealizuar.
