Forcat e policisë në Ekuador kanë vënë në pranga një ish-kryebashkiak, i cili akuzohet si burimi kryesor i financimit për grupin kriminal Los Lobos, një organizatë e përzier në trafikun e narkotikëve dhe shfrytëzimin e paligjshëm të minierave.
I arrestuari është Elias Baldor Bermeo, i mbiquajtur “BB”, të cilin ministri i Brendshëm, John Ryberg, e përshkroi si “financuesi kryesor i një prej organizatave më të përgjakshme që ky vend ka parë ndonjëherë”.
Të lidhura
None found
Sipas zyrtarëve, kapja e ish-kryetarit të bashkisë së Camilo Ponce Enrique përbën një goditje të fuqishme për bandën Los Lobos, e cila prej vitesh ka grumbulluar miliona dollarë fitime përmes minierave të jashtëligjshme.
Administrata e presidentit Daniel Noboa, me përkrahjen e Shteteve të Bashkuara, po shton përpjekjet për të çrrënjosur grupimet kriminale dhe kartelet e drogës që veprojnë në territorin ekuadorian, si dhe për të ndaluar zgjerimin e aktivitetit minerar të paligjshëm.
Gjatë aksionit policor në provincën andine të Azuay, hetuesit gjetën shufra ari të stampuara me portretin e të ndjerit Pablo Escobar, bosit famëkeq kolumbian të drogës. Në kuadër të operacionit u ndaluan gjithsej gjashtë persona, përfshirë këtu edhe të afërm të Bermeos.
Ministri Ryberg shtoi se Elias Baldor Bermeo është gjithashtu nën hetim për drejtimin e aktiviteteve të minierave ilegale dhe për kryerjen e sulmeve me mjete shpërthyese.
Deklarata e tij bëri të ditur se, gjatë harkut kohor 2023–2025, Bermeo ka zhvendosur përafërsisht 3.2 milionë dollarë nëpërmjet kompanive minerare.
