Pas certifikimit të rezultateve të zgjedhjeve të 7 qershorit, fokusi i politikës kosovare është zhvendosur te krijimi i institucioneve të reja. Në mesin e zhvillimeve të para nga konsultimet politike, Partia Demokratike e Kosovës ka konfirmuar se do të mbetet në opozitë. Këtë qëndrim e bëri publik kryetari i PDK-së, Bedri Hamza, pas takimit me kryetarin e Lëvizjes Vetëvendosje dhe kryeministrin në detyrë, Albin Kurti.
Të lidhura
None found
Ndonëse prej përfundimit të procesit zgjedhor ka kaluar një periudhë e konsiderueshme, subjektet politike ende nuk kanë arritur një pajtim që do të mundësonte konstituimin e Kuvendit dhe formimin e qeverisë së re.
Si subjekti i parë nga zgjedhjet, Lëvizja Vetëvendosje ka hapur rundin e parë të bisedimeve me partitë parlamentare, me synim sigurimin e mbështetjes për ngritjen e institucioneve. Deri tani, këto kontakte nuk kanë prodhuar marrëveshje konkrete, ndërsa dallimet mes palëve politike vazhdojnë të jenë të theksuara.
Albin Kurti ka njoftuar se komunikimi me partitë e tjera do të vijojë edhe gjatë ditëve të ardhshme, çka tregon se negociatat nuk kanë arritur ende në momentin përcaktues. Ndërkohë, opozita ka riafirmuar pozicionet e saj për një bashkëpunim të mundshëm, duke paraqitur kushte dhe kufij për çdo marrëveshje eventuale.
Në këtë situatë, dilema kryesore mbetet nëse bisedimet do të sjellin kompromisin politik të domosdoshëm apo Kosova mund të përballet me një bllokadë të zgjatur institucionale.
Sipas vlerësimeve të paraqitura në debat, drama që po zhvillohet në skenën politike të Kosovës ka për synim dobësimin e mëtejshëm të LDK-së.
Qarri: Bashkëpunimi ndërpartiak nuk është vetëm çështje e vullnetit politik, por edhe përgjegjësi para elektoratit dhe obligim kushtetues ndaj shtetit
Për zhvillimet politike ka folur për “Bota sot” analisti politik Gani Qarri, i cili ka vlerësuar se zgjedhjet e 7 qershorit nuk e kanë zgjidhur ngërçin politik.
Sipas Qarrit, partitë duhet të arrijnë pa vonesë një konsensus për krijimin e institucioneve dhe zgjedhjen e presidentit. Ai theksoi se zgjedhjet e 7 qershorit ishin të tretat në më pak se një vit e gjysmë, pas zgjedhjeve të rregullta kushtetuese të 9 shkurtit dhe zgjedhjeve të parakohshme të 28 dhjetorit 2025.
Analisti tha se, megjithëse Kosova kaloi rreth 19-20 muaj me ngërçe politike dhe bllokada institucionale, zgjedhjet e 7 qershorit nuk sollën ndryshim në procesin e formimit të institucioneve, përveç përcaktimit të partisë që do të qeverisë vendin.
Qarri vlerësoi se këto zgjedhje nuk ofruan zgjidhje as për çështjen e presidentit. Ai tha se ende nuk ekziston një marrëveshje konkrete, pavarësisht takimeve të kryeministrit me përfaqësues të PDK-së dhe LDK-së, duke shtuar se lojërat e partive në Parlament nuk duhet të tolerohen më nga qytetarët e Kosovës. Sipas tij, nëse paraqitet nevoja, ato duhet të kundërshtohen edhe përmes protestave qytetare, në mënyrë që kauzat e inskenuara dhe fiktive të mos përdoren më si arsyetim për bllokada dhe zvarritje politike.
Ai tha se konsensusi për zgjedhjen e presidentit është kthyer në një çështje që shqetëson edhe qytetarët dhe ka përqendruar vëmendjen politike e publike në Kosovë. Për këtë arsye, Qarri kërkoi që përpjekjet e pozitës dhe opozitës të drejtohen te formimi i institucioneve të reja dhe zgjedhja e presidentit, me qëllim të rikthimit të funksionimit normal të shtetit.
Më tej, analisti argumentoi se Vetëvendosje duhet të vazhdojë bisedimet, veçanërisht me LDK-në, për të siguruar pajtim për presidentin. Ai paralajmëroi se mungesa e një marrëveshjeje mund ta fusë vendin sërish në krizë politike.
Sipas tij, partia në pushtet ka fituar 47.13% të votave, përkatësisht 53 ulëse në Kuvendin e legjislaturës së re. Qarri tha se, së bashku me minoritetet jo-serbe, ajo i ka të sigurta 61 vota, të mjaftueshme për konstituimin e Kuvendit dhe formimin e Qeverisë, por jo për zgjedhjen e presidentit të ri.
Ai shtoi se pretendohet se, sipas “kushtetutës”, për vlefshmërinë e votimit për presidentin në Kuvendin me 120 deputetë kërkohet prania e 2/3-së së deputetëve. Sipas Qarrit, ky fakt shkaktoi krizën politike edhe këtë vit dhe çoi vendin në zgjedhjet e parakohshme të 7 qershorit.
Qarri vlerësoi se Vetëvendosje do të duhej të hynte në koalicion me LDK-në, jo me Vjosën presidente, por me të si ministre e Jashtme ose zëvendëskryeministre e parë, si një kompromis i vullnetit të mirë nga të dyja palët.
Analisti tha se Kurti, duke qenë i vetëdijshëm se çdo vonesë e dëmton procesin politik dhe i jep sinjal negativ Kosovës si shtet i ri edhe në raport me ndërkombëtarët, duhet t’i çojë deri në fund përpjekjet për marrëveshje. Sipas tij, negociatat me opozitën duhet të vazhdojnë në ditët në vijim, derisa të gjendet konsensusi për zgjedhjen e presidentit.
Ai rikujtoi se dështimi për të arritur pajtim ndërmjet partive për presidentin konsensual, në fund të prillit të këtij viti, rezultoi me shpërndarjen e Kuvendit dhe mbajtjen e zgjedhjeve të parakohshme të 7 qershorit.
Sipas Qarrit, zgjedhjet e fundit jo vetëm që nuk e zgjidhën çështjen e presidentit, por prodhuan një situatë afërsisht të njëjtë në skenën politike. Ai paralajmëroi se moszgjedhja e sërishme e një presidenti konsensual, edhe pse bëhet fjalë për një post më ceremonial, mund ta çojë Kosovën në zgjedhje të tjera të parakohshme, të katërtat brenda vetëm dy vitesh.
Ai theksoi se zgjedhje të tilla nuk janë të nevojshme dhe nuk do ta zgjidhnin çështjen e presidentit. Sipas tij, Kosova nuk mund të bllokohet dhe nuk duhet të detyrohet të qëndrojë në vend apo të mbajë zgjedhje çdo tre-katër muaj, pasi pasojat më të mëdha do t’i bartnin vendi dhe qytetarët e tij.
Qarri u bëri thirrje deputetëve të zgjedhur dhe partive të përfaqësuara në Parlament që të marrin seriozisht përgjegjësinë e tyre, pasi pa marrëveshje politike vendi mund të shkojë përsëri në zgjedhje të parakohshme. Ai tha se bashkëpunimi ndërpartiak nuk varet vetëm nga vullneti politik, por përbën edhe përgjegjësi ndaj elektoratit dhe obligim kushtetues ndaj shtetit.
Sipas analistit, deputetët që kanë marrë besimin e qytetarëve duhet të dëshmojnë përgjegjësi, të sigurojnë kuorumin e nevojshëm në Kuvend dhe të japin kontribut personal për zgjedhjen e presidentit. Në këtë mënyrë, tha ai, mund të tejkalohet ngërçi dhe të shmangen zgjedhjet e tjera të dëmshme e të panevojshme.
Qarri përfundoi duke thënë se vetëm kështu mund të mbyllet odiseja e bllokadave të pazakonta politike dhe të garantohet puna e papenguar e institucioneve. Ai kritikoi bllokadat që, sipas tij, inskenohen nga partitë aktuale, të cilat marrin paga të majme nga taksapaguesit e varfër të vendit, duke thënë se këto qasje nuk kanë mbështetje reale juridike dhe shërbejnë për zvarritjen e formimit të institucioneve dhe pengimin e funksionimit normal të Republikës së Kosovës.
Tahiraj: Dobësimi i LDK-së do të ishte njëkohësisht edhe dobësim i shtyllës kryesore të orientimit euroatlantik
Për të njëjtën temë ka folur për “Bota sot” edhe veprimtari nga diaspora, Saim Tahiraj.
Tahiraj vlerësoi se veprimet politike të Lëvizjes Vetëvendosje, sipas tij, nuk lidhen vetëm me krijimin e institucioneve, por synojnë edhe dobësimin politik të LDK-së.
Ai shprehu dyshimin se takimet dhe bisedimet e tanishme mund të jenë pjesë e një strategjie për dëmtimin e pozitës së LDK-së, edhe në rast se arrihet marrëveshje për bashkëqeverisje.
Sipas Tahirajt, lufta politike e krahut të majtë, e trashëguar nga LPK-ja dhe e vazhduar nga pasardhësit e saj politikë, VV-ja, PDK-ja dhe AAK-ja, nuk është ndërprerë kurrë. Ai tha se objektivi mbetet dobësimi deri në shkatërrim i LDK-së, në mënyrë që drejtimi i shtetit të Kosovës të mbetet përfundimisht në duart e së majtës.
Ai iu referua takimit mes kryetarit të VV-së, Albin Kurti, dhe kryetarit të PDK-së, Bedri Hamza, i cili para opinionit u paraqit si takim pa rezultat dhe pa marrëveshje. Megjithatë, Tahiraj tha se ekziston mundësia që ky të ketë qenë një veprim taktik për të krijuar hapësirë për kontakte të reja dhe për një koalicion të mundshëm me LDK-në.
Nëse kjo tezë është e saktë, sipas Tahirajt, çdo veprim politik i Kurtit do të synonte dobësimin politik të LDK-së, komprometimin e saj para elektoratit dhe largimin e saj nga skena si faktor vendimmarrës. Ai vlerësoi se formimi i institucioneve nuk duket të jetë prioriteti kryesor, ndërsa përfitimi politik në dëm të kundërshtarit paraqitet si synimi kryesor.
Tahiraj deklaroi se mbetet skeptik për një koalicion të mundshëm mes VV-së dhe LDK-së. Edhe nëse do të arrihej një marrëveshje e tillë, ai paralajmëroi se ajo mund të përdorej si mjet për konsumimin politik të LDK-së dhe për largimin e saj të mëvonshëm nga loja.
Në përmbyllje të prononcimit, veprimtari u bëri thirrje drejtuesve dhe anëtarëve të LDK-së që të veprojnë me maturi, unitet dhe kujdes në marrjen e vendimeve. Ai tha se dobësimi i kësaj partie do të ndikonte jo vetëm në peshën e saj politike, por edhe në orientimin euroatlantik dhe shtetformues të Kosovës.
Sipas Tahirajt, lidershipi i LDK-së duhet të shfaqë urtësi, maturi dhe vendosmëri, duke peshuar me kujdes çdo vendim. Ai tha se pasojat nuk do të kufizoheshin vetëm te partia, por do të prekeshin edhe orientimi politik i shtetit të Kosovës.
Ai vlerësoi se dobësimi i LDK-së do të nënkuptonte njëherësh dobësimin e shtyllës kryesore të orientimit euroatlantik dhe të filozofisë shtetformuese që kjo parti ka përfaqësuar ndër vite.
Tahiraj tha se sulmet e vazhdueshme politike nga kundërshtarët majtistë, të shoqëruara me veprimet e personave që shumë i konsiderojnë “kolona e pestë” brenda vetë LDK-së, mund të prodhojnë pasoja të rënda. Për këtë arsye, ai kërkoi syçeltësi, unitet, përgjegjësi dhe qëndrueshmëri nga çdo anëtar i LDK-së, nga më i thjeshti deri te Kryesia Qendrore.
Historia, sipas Tahirajt, ka treguar se sfidat më të mëdha nuk kapërcehen me emocione, por me mençuri, bashkim dhe besim në vlerat mbi të cilat është ndërtuar LDK-ja. Ai theksoi se pikërisht këto vlera duhet të ruhen edhe sot.
