Pushuesit në plazhin Antai, në Francë, u përballën papritur me një situatë kaotike, kur një ditë e qetë vere u ndërpre nga goditja e stuhisë së njohur si “galerne”. Fenomeni solli erëra të forta në bregdet dhe një ulje të ndjeshme të temperaturës.
Regjistrimet nga zona tregojnë çastin kur ndryshojnë kushtet atmosferike, ndërsa turistët nxitojnë të gjejnë strehim dhe të marrin sendet e tyre. Peshqirë, çadra, dërrasa surfi dhe objekte të tjera u ngritën në ajër nga forca e erës.
Të lidhura
None found
Sipas raportimeve, temperatura u ul me 11 gradë Celsius brenda vetëm gjashtë minutash, teksa moti pësoi një kthesë të menjëhershme.
“Galerne” shfaqet në brigjet perëndimore të Francës dhe dallohet për erërat e fuqishme veriperëndimore, si edhe për rënien e menjëhershme të temperaturës. Ajo krijohet kur ajri i ftohtë nga Gjiri i Biskajës përplaset me masat më të ngrohta të ajrit mbi tokë, duke prodhuar erëra që mund të arrijnë deri në 95 km/h.
Qindra turistë u panë teksa mblidhnin me nxitim gjërat e tyre dhe kërkonin mbrojtje. Shumë prej tyre e cilësuan atë që ndodhi si një skenë “surreale”.
“U errësua papritur, u mbush me re dhe mjegull”, tha një grua.
Një pushues tjetër e përshkroi ngjarjen si “diçka që nuk e kishim parë kurrë më parë”.
