Katër ushtarakë kanë humbur jetën nga rrëzimi i një helikopteri ushtarak S-70 në provincën e Malatjas, në Turqi. Aksidenti ndodhi në zonën Samanköy, në distriktin Yeşilyurt.
Ministria turke e Mbrojtjes konfirmoi ngjarjen dhe bëri të ditur se shkaku i aksidentit nuk është përcaktuar ende. Sipas njoftimit zyrtar, ekipet mbërritën në vendin e rrëzimit dhe nisën menjëherë operacionet e kërkim-shpëtimit.
Të lidhura
None found
Në vendngjarje u dërguan ambulanca, zjarrfikëse dhe ekipe të shumta mjekësore. Më pas, ministria konfirmoi se të katër ushtarakët që ndodheshin në helikopter kishin humbur jetën.
Në deklaratën e saj, ministria i cilësoi katër ushtarakët si të rënë në krye të detyrës dhe theksoi se arsyeja e rrëzimit të helikopterit S-70 në Malatja mbetet e panjohur. Institucioni u shprehu ngushëllime familjeve të viktimave, Forcave të Armatosura turke dhe qytetarëve të vendit.
Edhe guvernatori i Malatjas, Seddar Yavuz, shkoi në zonën e aksidentit, ku kreu inspektime së bashku me përfaqësues të autoriteteve ushtarake. Në një reagim në rrjetet sociale, ai konfirmoi vdekjen e katër ushtarakëve dhe u përcolli ngushëllime familjeve të tyre.
Rrethanat e rrëzimit mbeten të paqarta dhe pritet të sqarohen nga hetimet.
