Një 38-vjeçar ka humbur jetën në Itali, pasi u fut në lumin Tagliamento për të nxjerrë djalin e tij të vogël, të cilin e kishte marrë rrjedha e ujit.
Të lidhura
None found
Ngjarja e rëndë u regjistrua pranë Ronchis di Latisana, në provincën e Udines, poshtë viaduktit të autostradës A4. Ishin disa kalimtarë të rastësishëm që ngritën alarmin dhe njoftuan shërbimet e emergjencës, pasi vunë re njerëz në vështirësi në lumë.
Sipas autoriteteve italiane, viktima ishte një murator 38-vjeçar me origjinë nga Baku i Azerbajxhanit, banues në Pontebba, në provincën e Udines.
Referuar raportimeve, ai u hodh në ujë në momentin kur djali i tij 5-vjeçar e gjysmë u mor nga rryma. Pranë tyre ndodheshin edhe dy vajzat e familjes, 9 dhe 11 vjeçe. 38-vjeçari arriti ta nxirrte djalin në breg, ndërsa dy vajzat dhe nëna e tyre morën ndihmë nga persona që ndodheshin afër vendit të ngjarjes.
Menjëherë pasi shpëtoi të birin, burri u zhduk në ujërat e lumit.
Në vendin e ngjarjes mbërritën zjarrfikësit, një helikopter dhe zhytësit, të cilët nisën menjëherë operacionin e kërkimit. Pas disa orësh, trupi i pajetë i 38-vjeçarit u gjet në bregun tjetër të lumit Tagliamento.
Ndërkaq, djali 5-vjeçar, i cili kishte pësuar sindromë të rëndë mbytjeje, u dërgua me helikopter në spitalin e Udines. Mjekët bënë të ditur se ai ndodhet jashtë rrezikut për jetën.
