Raportuesi për Kosovën në Parlamentin Evropian, eurodeputeti Riho Terras, u prit sot në një takim nga kryetari i Partisë Demokratike të Kosovës, Bedri Hamza.
Të lidhura
None found
Në këtë takim u bisedua për zhvillimet politike në vend, për procesin e integrimit evropian, si dhe për nevojën e tejkalimit të ngërçit institucional.
Sipas njoftimit, Hamza e falënderoi Riho Terras për angazhimin e tij të vazhdueshëm dhe për raportin e fundit të Parlamentit Evropian për Kosovën. Ai vlerësoi veçanërisht konfirmimin se e ardhmja e Kosovës është në Bashkimin Evropian, si edhe mbështetjen për aplikimin e Kosovës për anëtarësim.
Hamza dhe Terras e konsideruan raportin e Parlamentit Evropian si një mesazh të rëndësishëm mbështetës për Kosovën, por edhe si një thirrje që vendi të mos humbë më kohë për shkak të krizave të brendshme politike dhe vonesave në funksionalizimin e institucioneve.
Kreu i PDK-së theksoi se Partia Demokratike e Kosovës ndan shqetësimin e shprehur në raport për pamundësinë e krijimit të institucioneve plotësisht funksionale për një periudhë të gjatë.
Ai nënvizoi se Kosovës i duhen institucione funksionale që marrin vendime, zbatojnë reforma dhe rindërtojnë besimin me partnerët ndërkombëtarë.
“Stabiliteti nuk duhet të nënkuptojë vetëm formimin e institucioneve, por edhe qeverisjen demokratike, dialogun politik dhe respektimin e Kushtetutës”, tha Hamza.
Bedri Hamza shprehu gjithashtu mirënjohje për rolin e eurodeputetit Riho Terras dhe të Parlamentit Evropian, duke i cilësuar si mbështetës të fuqishëm të Kosovës dhe të aspiratave tona për anëtarësim në Bashkimin Evropian.
Gjatë ditës, Terras ka zhvilluar takim edhe me U. D. Presidenten e Kosovës, Albulena Haxhiun.
