Kina ka aktivizuar shkallën më të lartë të alarmit për tajfunin Maysak, i cili ka goditur rajonin jugor të Guangxi-t me reshje intensive dhe përmbytje të shumta.
Të lidhura
None found
Deri në këto momente, bilanci flet për dy viktima, ndërsa afërsisht 48 mijë banorë janë evakuuar nga zonat që konsiderohen të rrezikuara.
Autoritetet vendore bëjnë të ditur se shirat e rrëmbyer kanë sjellë shembjen e disa digave në Nanning, kryeqendra e Guangxi-t. Pas çarjes së një dige në Rezervuarin Liulan u shkaktuan rrëshqitje balte, ndërsa një tjetër digë u shemb në Rezervuarin Yunbiao. Gjithashtu, Rezervuari Liugang doli nga shtrati, duke e rënduar më tej gjendjen në zonat përreth.
Në Fangchenggang, më shumë se 800 banorë janë detyruar të lënë shtëpitë e tyre për shkak të përmbytjeve. Në të njëjtën kohë, niveli i ujit ka kaluar pragun e alarmit në 66 stacione hidrologjike përgjatë 55 lumenjve në Guangxi.
Të dhënat zyrtare tregojnë se në zonën e Luwei ranë 637 milimetra shi brenda vetëm 24 orëve, çka solli përmbytje të menjëhershme dhe dëme të mëdha.
Ndonëse Maysak u dobësua në një stuhi pasi hyri në territorin kinez, autoritetet kanë paralajmëruar se reshjet e dendura pritet të vazhdojnë në Guangxi dhe në pjesën më të madhe të Kinës jugore edhe në ditët e ardhshme.
Për menaxhimin e situatës, janë vënë në dispozicion 1,372 ekipe shtesë shpëtimi dhe 140 mjete lundruese, të cilat po përdoren në operacionet e evakuimit dhe në ndihmë të banorëve të prekur.
