Gjatë vizitës në ishullin italian të Lampeduzës, Papa Leoni XIV i bëri apel Europës që çështjes së emigracionit t’i përgjigjet me një plan afatgjatë, duke e përshkruar këtë fenomen si një “thirrje epokale” për shoqëritë europiane.
Të lidhura
None found
Në fillim të vizitës së tij, Ati i Shenjtë u lut në varrezat e Lampeduzës, pranë vendit ku janë varrosur emigrantë që humbën jetën në det, mes tyre edhe një foshnje gjashtëmuajshe nga Guinea. Më pas ai shkoi te “Porta e Europës”, monumenti simbolik i ishullit, ku u drejtua i vetëm drejt bregut me sytë nga Mesdheu, në një çast me domethënie të thellë simbolike.
Ndërsa kremtonte meshën pranë portit ku mbërrijnë mijëra emigrantë, Papa tha se Europa, për shkak të pozicionit të saj gjeografik dhe rolit më të gjerë që mban, duhet të lërë pas qasjen e kufizuar te menaxhimi i krizave dhe të ndërtojë politika të qëndrueshme. Sipas tij, këto politika duhet të sigurojnë shpëtimin, mbrojtjen dhe integrimin e azilkërkuesve, si edhe mbështetjen për zhvillimin e vendeve të tyre të origjinës, në mënyrë që askush të mos detyrohet të largohet nga shtëpia.
Ati i Shenjtë theksoi se me mijëra njerëz kanë humbur jetën në Mesdhe dhe se këto viktima janë rezultat jo vetëm i vendimeve të gabuara, por edhe i mungesës së veprimit. Ai nënvizoi se varfëria, luftërat, trafikimi i qenieve njerëzore dhe indiferenca kanë prodhuar një tragjedi që nuk mund të shpërfillet. “Lutem që bota e sotme dhe e nesërme të bëhet më njerëzore për të gjithë”, u shpreh ai.
Kreu i Kishës Katolike shprehu gjithashtu mirënjohje për banorët e Lampeduzës, vullnetarët, rojën bregdetare, mjekët dhe të gjithë ata që ndër vite kanë ndihmuar emigrantët, duke e cilësuar solidaritetin e tyre si një “mrekulli të dhembshurisë”.
