Ukraina ka kundërshtuar deklaratat e Rusisë se trupat e saj kanë vënë nën kontroll Kostyantynivka-n, qytet në lindje të vendit.
Të lidhura
None found
Kjo qendër urbane shihet si një nyje e rëndësishme e mbrojtjes ukrainase në aksin që të çon drejt qendrave të fundit të mëdha të Donbasit që vazhdojnë të mbeten nën administrimin e Kievit.
“Ne e mohojmë. Këto janë pretendime të rreme”, u shpreh një zyrtar i Shtabit të Përgjithshëm të Ukrainës, duke hedhur poshtë njoftimin e bërë nga Moska.
Një ditë më herët, zëdhënësi i Kremlinit, Dmitry Peskov, kishte thënë se Kostyantynivka ishte “pushtuar plotësisht” dhe se qyteti ishte tashmë nën kontrollin e forcave ruse. Sipas tij, presidenti rus Vladimir Putin kishte zhvilluar gjithashtu bisedime me komandën ushtarake për situatën në vijën e frontit.
Në të njëjtën kohë, autoritetet ruse njoftuan se gjatë natës Shën Petersburgu dhe rajoni i Leningradit u goditën nga një sulm i madh me dronë ukrainas.
Guvernatori i Shën Petersburgut, Alexander Beglov, deklaroi se qyteti me rreth gjashtë milionë banorë ishte shënjestruar nga një sulm “në shkallë të gjerë”, pa dhënë hollësi për objektivat e prekura. Megjithatë, mediat lokale raportuan se në terminalin e naftës të qytetit shpërtheu një zjarr pas sulmit.
Ndërkaq, guvernatori i rajonit të Leningradit, Alexander Drozdenko, njoftoi se dronët kishin vënë në shënjestër edhe portin e Vysotskut, rreth 170 kilometra nga Shën Petersburgu, në Gjirin e Finlandës. Ky port përdoret për eksportimin e naftës, drithërave, qymyrit dhe gazit natyror të lëngshëm.
Sipas Drozdenkos, mbrojtja ajrore ruse rrëzoi 72 dronë mbi rajonin e Leningradit.
