Pas përleshjes së armatosur në qendër të Podujevës, ku mbetën të plagosur katër persona, qytetarët e këtij qyteti shprehën keqardhje dhe revoltë për ngjarjen.
Sipas autoriteteve, incidenti ndodhi rreth orës 13:30 në qendër të qytetit.
Të lidhura
None found
Prokuroria Themelore në Prishtinë bëri të ditur se shkaku i dyshuar i rastit ishte një mosmarrëveshje paraprake. Po ashtu, u tha se personat e dyshuar kanë lidhje familjare nip dhe dajë, ndërsa motivi i dyshuar i kësaj çështje lidhet me një mosmarrëveshje paraprake.
Nga katër të plagosurit, tre ishin të përfshirë në shkëmbimin e zjarrit, ndërsa njëri ishte një kalimtar i rastit.
Të lënduarit u dërguan për trajtim mjekësor në Qendrën Klinike Universitare të Kosovës.
Drejtori i Klinikës së Emergjencës në QKUK, Naser Syla, tha: “Ata kanë pësuar plagë të rënda, por gjendja e tyre shëndetësore “është stabile për momentin”.”
Qytetari Behram Kolla e përshkroi si katastrofë ngjarjen me armë në mes të sheshit të Podujevës.
Kolla: Katastrofë, pasha Zotin!
“Katastrofë, Pasha Zotin po, kështu vaki s’ka bo, pa kurgjo hiq në mes të sheshit e popullit me gju kallasha, katastrofë”, tha Kolla.
Edhe Ukshin Hoti e konsideroi shumë shqetësuese situatën, duke thënë se është e rëndë që njeriu të ketë frikë të dalë në qytetin e vet.
Hoti: Me u tut njeriu me dalë në vend të vet është shumë keq
“Ata që veprojnë kështu, ata nuk duhet me jetu këtu. Ata i kisha hek prej këtij vendi, i kisha qu në njëfarë xhunglle. Se në këtë liri, me u tut njeri me dal në vend të vetë është shumë keq”, tha Hoti.
Në të njëjtën linjë u shpreh edhe qytetari Halim Morina.
Morina: Menjëherë të kapen e të dënohen
“Vetëm i lumi Zot ka të drejtë, se ai na ka dhënë shpirtin edhe ai na e merr. Ndërsa bandat që dalin me armë nëpër qytet e gjuajnë e vrasin, atë të fajshmin e të pafajshmin e kudo që gjejnë në rrugë, çfarë lyp ai? Ato duhet me i eliminuar, duhet me me, nuk po them me vra, menjëherë me kapë e me çu 30 vjet burg me dënu”, tha ai.
