Kriza e shkaktuar nga mbyllja e Ngushticës së Hormuzit ka vënë në vështirësi ekonomitë që mbështeten te importet e naftës, ndërsa Kina është shfaqur si një ndër përfitueset më të mëdha të kësaj gjendjeje. Ky është vlerësimi i firmës këshillimore amerikane The Asia Group në një raport të publikuar së fundmi.
Sipas dokumentit, Pekini ka mundur ta përballojë goditjen e krizës falë shpërndarjes më të gjerë të burimeve të energjisë, si edhe përdorimit të rezervave strategjike të naftës.
Të lidhura
None found
Raporti nënvizon se ekspertët e shohin Kinën jo vetëm si një vend që ka arritur të zbusë efektet e tronditjes në tregjet globale të energjisë, por edhe si një përfituese nga zgjerimi i eksporteve të teknologjive të energjisë së pastër. Në të njëjtën kohë, Pekini po e shfrytëzon konfliktin në Iran për të konsoliduar imazhin e vet si një aktor i qëndrueshëm në skenën ndërkombëtare.
“Ekonomikisht dhe gjeopolitikisht, Pekini po e përdor krizën për ta paraqitur Kinën si partnerin më të besueshëm”, thuhet në raport, i cili shton se udhëheqja kineze e sheh këtë situatë si dëshmi të strategjisë së saj të vetëmbështetjes industriale.
Megjithatë, The Asia Group paralajmëron se një zgjatje e krizës energjetike mund ta vendosë Kinën përballë rritjes së kostove të lëndëve të para dhe një ngadalësimi të ekonomisë globale, gjë që do të ndikonte edhe në kërkesën për eksportet kineze.
Përkundër këtyre rreziqeve, raporti vlerëson se ekonomia e Kinës mbetet në një pozitë më të favorshme për të përballuar paqëndrueshmërinë ekonomike sesa shumë vende të tjera që varen nga furnizimet energjetike të Lindjes së Mesme.
