Shtetet e Bashkuara ndërmorën sulme ajrore kundër objektivave ushtarake iraniane, pasi akuzuan Teheranin se ka shkelur armëpushimin dhe se qëndron pas një sulmi me dron ndaj një anijeje mallrash në Ngushticën e Hormuzit.
Komanda Qendrore Amerikane, CENTCOM, bëri të ditur se në shënjestër janë vënë struktura të përdorura për ruajtjen e raketave dhe dronëve, si edhe pozicione të radarëve bregdetarë.
Të lidhura
None found
Sipas zyrtarëve amerikanë, ky operacion erdhi si reagim ndaj sulmit të së enjtes mbi anijen tregtare “Ever Lovely”, që lundronte me flamurin e Singaporit dhe u godit pranë portit të Dahit në Oman. Uashingtoni e përshkroi ndërhyrjen si një “përgjigje të fuqishme” ndaj një akti që, sipas tij, vuri në rrezik lirinë e lundrimit në një prej korridoreve detare më të rëndësishme në botë.
Autoritetet amerikane thanë gjithashtu se sulmet iraniane ndaj anijeve tregtare bien ndesh me marrëveshjen e armëpushimit të arritur më 17 qershor, e cila parashikonte kalim të sigurt për anijet tregtare për 60 ditë. Sipas CENTCOM, SHBA do të vazhdojë të mbështesë kalimin e sigurt në ngushticë.
Nga ana tjetër, Teherani i mohoi akuzat dhe deklaroi se anija kishte ndjekur një itinerar “të paautorizuar” në Ngushticën e Hormuzit, ndërsa veprimet amerikane i cilësoi si shkelje të armëpushimit.
Korpusi i Gardës Revolucionare Islamike, IRGC, deklaroi se marina iraniane është kundërpërgjigjur duke goditur pozicione ushtarake amerikane në rajon, por pa dhënë hollësi të tjera.
Zëvendëspresidenti amerikan JD Vance u shpreh se çdo akt dhune do të marrë një përgjigje të fortë, ndërsa Presidenti Donald Trump tha se hapat e ardhshëm të SHBA-së “do të zbulohen”, pa ofruar detaje të tjera lidhur me armëpushimin.
Irani, nga ana e tij, akuzoi Uashingtonin për “shkelje të armëpushimit në mes të negociatave” dhe paralajmëroi se çdo përshkallëzim i mëtejshëm do të sjellë pasoja. Zyrtarë iranianë shtuan se administrimi i Ngushticës së Hormuzit nuk do të rikthehet në gjendjen që kishte para konfliktit.
Zhvillimet e fundit kanë rritur tensionet në këtë zonë strategjike për transportin global të naftës dhe gazit. Mbylljet e përkohshme të ngushticës dhe përkeqësimi i situatës kanë ndikuar si në tregjet energjetike, ashtu edhe në qarkullimin ndërkombëtar të mallrave.
