Një valë e gripit të shpendëve ka shkaktuar ngordhjen e të paktën 13 mijë fokave të vogla, pinguinëve dhe zogjve në Antarktidë, ndërsa studiuesit paralajmërojnë se virusi po përhapet me ritëm të shpejtë edhe në zonat më të izoluara të planetit.
Të dhënat e mbledhura nga Programi Australian i Antarktidës (AAP) tregojnë se, nga tetori 2025 deri në janar 2026, përmes vëzhgimeve me dron u zbuluan mijëra kufoma fokash në Ishullin Heard dhe Ishujt McDonald, territore të largëta subantarktike që administrohen nga Australia.
Të lidhura
None found
Të pozicionuar rreth 4,000 kilometra në jugperëndim të Australisë, këta ishuj janë konsideruar prej kohësh si një strehë me rëndësi të veçantë për shpendët dhe gjitarët detarë.
Sipas studiuesve, nga afro 17 mijë foka të vogla që jetonin në këtë rajon, rreth 13 mijë kanë ngordhur, çka përbën 76% të popullsisë vendase. Në disa koloni të caktuara, niveli i vdekshmërisë ka shkuar deri në 97%.
“Ajo që ende nuk dimë është ndikimi i saktë që virusi ka pasur te popullata e fokave të rritura”, u shpreh Jarrod Hodgson, studiues i lartë në Programin Australian të Antarktidës.
Studimet tregojnë gjithashtu se nga e njëjta sëmundje kanë ngordhur edhe qindra pinguinë mbretërorë në Ishullin Heard.
“Kjo është hera e parë që gripi i shpendëve dokumentohet në një rajon kaq të largët, çka tregon se virusi po zgjerohet në territore të reja”, deklaroi biologja e jetës së egër Julie McInnes.
Ajo theksoi se raste të ngjashme janë regjistruar edhe në ishuj të tjerë të Antarktidës, mes tyre edhe Xhorxhia Jugore, ku duket se ndër speciet më të goditura kanë qenë fokat e elefantëve.
Deri në shkurt 2026, as Australia kontinentale dhe as Zelanda e Re nuk kishin raportuar ende raste të variantit H5N1 të gripit të shpendëve, i cili është përhapur gjerësisht te shpendët në gjithë botën dhe ka infektuar edhe disa lloje gjitarësh.
Sipas studimit, ka shumë gjasa që virusi të jetë sjellë në Ishullin Heard dhe Ishujt McDonald nga kafshë të egra migratore që kanë ardhur nga Ishujt Crozet, rreth 1,800 kilometra larg. Studiuesit vlerësojnë se ai mund të ketë mbërritur në këtë zonë rreth muajit gusht të vitit 2025.
