Ndryshimet në futboll janë të shpeshta në vitet e fundit, ndërsa një tjetër është sugjeruar nga ish-gjyqtari i njohur Kolina. Presidenti i “Komitetit të Arbitrave në FIFA”, ka propozuar ndryshimin e mënyrës se si ekzekutohen penalltitë gjatë kohës së rregullt në futboll:
“Unë mendoj se ekziston një pabarazi e tepruar mes mundësive të atij që ekzekuton penalltinë dhe portierit. Mesatarisht, 75% e penalltive përfundojnë me gol. Për më tepër, ekziston edhe mundësia e një topi të kthyer pas pritjes së portierit.
Një zgjidhje është rregulli “Një goditje”, i ngjashëm me atë që shohim në seritë e penalltive pas kohës shtesë. Pa top të kthyer. Ose shënon, ose loja rifillon me rivënie fundore.
Kjo do të eliminonte gjithashtu spektaklin që shohim shpesh para ekzekutimit të penalltisë, me të gjithë lojtarët që grumbullohen rreth zonës. Duket si kuajt në vijën e nisjes përpara një gare”, u shpreh Kolina.
