Ministrja e Shtetit për Inteligjencën Artificiale, Diella, ka kaluar kufijtë e Shqipërisë dhe është bërë temë diskutimi në mediat kryesore ndërkombëtare.
Kryeministri Edi Rama, në një intervistë për “Times Radio”, u ndal te ky inovacion i qeverisë shqiptare, duke e cilësuar Diellën si “dielli që nuk perëndon kurrë”.
Të lidhura
None found
“Diella nuk fle, nuk ka nevojë të paguhet, nuk ka interesa private, nuk ka kushërinj, se kushërinjtë në Shqipëri janë një problem i madh. Dhe nuk i intereson nëse do ta pushojnë apo jo”, tha Rama, duke theksuar në të njëjtën kohë avantazhet e një ministreje AI krahasuar me një ministër njerëzor.
I pyetur nga gazetari për arsyet që e shtynë qeverinë të krijonte një post ministror të tillë, Rama nënvizoi se Shqipëria synon të shtyjë me më shumë shpejtësi përpara reformat e saj.
“Ne kemi vendosur të marrim këtë hap të madh sepse duam që të shtyjmë me më shumë shpejtësi reformat tona, dhe nuk është e nevojshme vetëm për reformat në termat digjitale, por në termat e modernizimit dhe siç gjithnjë e kam thënë, teknologjia e re dhe tani AI, janë një bekim për vende si ne që vijnë nga një rrugë e gjatë. Në kohën e progresit linear do ta kishim shumë më të vështirë të rifitonim kohën e humbur”, theksoi ai.
Sipas kryeministrit, Diella po tregon një forcë drejtuese të jashtëzakonshme në proceset reformuese.
“Është e vështirë për një ministër jo AI të çojë përpara një reformë me kaq efikasitet dhe shpejtësi sa një ministër artificial”, u shpreh ai.
Në vijim, Rama i bëri të ditur gazetarit britanik se inteligjenca artificiale po e ndihmon Shqipërinë edhe në procesin e integrimit europian, duke përmendur përkthimin në kohë rekord të grupkapitujve si një shembull konkret i përfitimeve të menjëhershme.
