Oficerët e Byrosë Kombëtare të Hetimit, me urdhër të SPAK zhvilluan dje kontrolle në banesën e kryetarit të Bashkisë së Tiranës Erion Veliaj.
Agjentët e BKH-së vepruan herët në mëngjes, ndërsa ka pritur disa momente jashtë ambienteve deri sa janë futur në apartament.
Mësohet se fillimisht bashkëshortja e kryebashkiakut ka kundërshtuar vendimin për marrjen e celularit edhe pse oficerët kishin vendim gjykate. Pavarësisht kësaj aparati është sekuestruar.
Vetë kreu i kryeqytetit nuk ndodhej në Shqipëri në kohën e kontrolleve, ndërsa ka postuar këtë video në facebook, ku shfaqet një tigër dhe mbi shkrimi “Mirëmëngjes nga kopshti zoologjik i Tiranës”.
Po ashtu, kontrolle janë zhvilluar edhe në banesën e Arbër Veliaj, vëllait të kryetarit të bashkisë, ku po ashtu mësohet se agjentët e BKH kanë sekuestruar dy telefonë celularë
BKH zbarkoi edhe në qendrën Harabel, rreth mesditës ku mësohet se ishte prezente dhe bashkëshortja e kryebashkiakut.
Ajo u largua nga prej aty rreth orës 20 të mbrëmjes, ndërsa agjentët e BKH-së dolën më herët.
SPAK në një deklaratë tha se ka kryer disa veprime hetimore për një procedim penal por shton se është në fazën fillestare.
Në Prokurorinë e Posaçme janë bërë disa kallëzime ndaj Veliajt, ku përfshihet prishja e Teatrit Kombëtar, incineratorët, por edhe dosja “5D”, ku tri drejtorë janë tashmë në burg.
Në një bashkëbisedim virtual me ndjekësit e tij në rrjetet sociale, kryedemokrati Sali Berisha deklaroi se Erion Veliaj nga tigër që ishte në mëngjes, në darkë u bë lepur, duke nënkuptuar se kryebashkiaku Veliaj është në telashe serioze.
PJESË NGA DEKLARATA E BERISHËS
Do të ndalem shkurtimisht, por edhe në një betejë tjetër, që u zhvillua dje, në orët më të para të mëngjesit dhe gjatë ditës këtu në vend, betejë të cilën mediat e pavarura e cilësuan si një betejë midis Kodrës së Diellit dhe Sarajeve të Surrelit, dhe me një element të veçantë, ultimatumin ‘Dabulla’.
Çfarë ndodhi dje?
Dje në orët e para të mëngjesit, ekipe të tëra të Skapit mësynë në shtëpinë e banimit të lali vjedhësit. Por dera e banesës nuk u hap të paktën për 1 orë e gjysmë.
Ekipet që kishin shkuar aty me mandat gjykate për të ushtruar kontroll dhe të gjitha veprimet, nuk guxuan të hapnin derën me forcë siç kërkon rregulli.
Por u prit gjersa në derë u paraqit një personazh, që askush nuk e imagjinonte se do të mund të ishte ai që do të hapte derën. Nuk ishte i vëllai i zonjës Veliaj, nuk ishte as kunati i saj, nuk ishin familjarët, nuk ishin punonjësit e bashkisë.
Por aty u paraqit Alban Dabulla, si i plotfuqishëm dhe vetëm pas paraqitjes së Dabullës, dera u hap.
Ndërkohë, Erion Veliaj nga Hamburgu në statusin e tij të parë u fotografua me një tigër, në fakt më mirë të kishte vendosur një hienë, se hiena i përshtatet atij. Por tigri ishte simbol i forcës dhe kërcënimit dhe natyrisht ndaj sarajeve të Surrelit dhe Edi Ramës.
E vërteta është se në këtë betejë, me kode mafioze që vazhdoi gjithë ditën, Alban Dabulla me ultimatumin e tij, luajti një rol përcaktues.
Dabulla i dërgoi Surrelit dhe jo vetëm, fotografitë e Olsi Ramës me Genti Xhixhën, me kolumbianët alkimistë të Xibrakës. Regjistrime që kishte nga aktiviteti i bandës së Xibrakës.
Për një ndërprerje të shkurtër në dosjen e Xibrës, njëri nga emrat krahas Ermal Hoxhës, Gentian Gjonajt, është edhe Dabulla, Besnik Dabulla, i vëllai i Albanit.
I vëllai i Albanit u lëshua mandat arresti në kohën e bandës së Xibrakës, por kur policia shkoi, Albani bëri të njëjtin akt, i dërgoi Ramës fotot e Olsit me grupin e kokainës, regjistrimet dhe policia u tërhoq, nuk e arrestoi Besnik Dabullën, anëtar aktiv i bandës së Xibrakës.
Tani pas kaq kohësh, në një kohë kur Olsi është akuzuar nga opozita, me fakte, dokumente se ai është anëtar i bandës së Xibrakës, Dabulla përsëri dje nxori dokumentet që disponon, me të cilat Olsin e çon drejt në qeli, jo vetëm në Shqipëri, por edhe në SHBA, se ai ka shtetësi edhe amerikane edhe shqiptare.
Çfarë ndodhi pas kësaj?
Pas kësaj miqtë e mi, ndodhi ajo që patë.
Endri Fuga zëdhënësi i Edi Ramës dhe Altin Dumanit, pas gjithë asaj zhurmnaje të madhe, lëshon një komunikatë se u sekuestrua telefoni i Ajola Xoxës. Kaq ishte. U katandis kokoshi në thelë.
Kurse Erion Veliaj, nga tigri u bë lepur, lëshoi një komunikatë ku tha, me kolegët e mi të Skapit, jam në harmoni të plotë, fajin e ka Berisha që e sulmon Skapin, rroftë Skapi dhe u mbyll hesapi.
Këto janë të vërtetat e betejës që i zhvillua dje mes Kodrës së Diellit, dhe sarajit të Surrelit.
