Kryeministri polak Donald Tusk tha se Polonia dhe Ukraina janë në bisedime për mbylljen e përkohshme të kufirit mes dy vendeve mes bllokadës nga fermerët protestues.
Por nga ana tjetër Kievi ka mohuar se diskutime të tilla ishin duke u zhvilluar.
Njoftimi vjen pasi fermerët polakë vazhdojnë të bllokojnë pikat kufitare në shenjë proteste kundër importit të grurit ukrainas.
Ata pretendojnë se prodhuesit nga vendi fqinj kanë një avantazh të padrejtë, duke qenë se nuk duhet të respektojnë rregulloret e BE-së ose të paguajnë taksat e BE.
“Ne po flasim gjithashtu me palën ukrainase për një mbyllje të përkohshme të kufirit dhe shkëmbimin e mallrave,” tha Tusk të mërkurën.
Autoritetet polake “duan të ndihmojnë Ukrainën, por ne nuk mund të lejojmë që kjo ndihmë të sjellë efekte shumë negative për qytetarët tanë.
Ne jemi vazhdimisht në kërkim të një zgjidhjeje që do të mbrojë tregun polak nga përmbytja me produkte bujqësore dukshëm më të lira ukrainase”, theksoi ai.
Kryeministri polak tha se nëse arrihet një marrëveshje për mbylljen e përkohshme të kufirit, do të jetë një zgjidhje “e dhimbshme” për të dyja palët.
Ai theksoi se përfundimisht Ukraina dhe Polonia do të duhet të gjejnë një zgjidhje më të përshtatshme, “afatgjatë” të krizës, e cila ka vazhduar që nga tetori.
“Unë jam gati të marr vendime, madje edhe të vështira, kur bëhet fjalë për kufirin me Ukrainën, gjithmonë në marrëveshje me Kievin, në mënyrë që të mos ketë tensione të panevojshme”, tha ai.
Megjithatë, zëvendëskryeministri i Ukrainës Aleksandr Kubrakov nxitoi të kundërshtojë pretendimet e Tusk, duke thënë se “askush nga pala ukrainase nuk po negocion për mbylljen e kufirit me Poloninë”.
