Jose Mourinho mbrojti nderin e tij si trajner gjatë konferencës së tij për shtyp para ndeshjes të së dielës ndaj Milanit, duke këmbëngulur se “nëse ka një shembull të përsosur profesionalizmi, jam unë”.
‘Special One’ e gjeti veten nën vëzhgim pas eliminimit të Romës nga Kupa e Italisë në fazën çerekfinale nga rivalët e urryer lokal, Lazio, të mërkurën në mbrëmje.
Giallorossët kanë duruar një seri ndeshjesh të vështira që nga fundi i periudhës festive, duke përfshirë përplasjet kundër Juventusit dhe Napolit në Serie A, si dhe Lazios të lartpërmendur në kupë. Më pas është një vizitë në San Siro për t’u përballur me Milanin e Stefano Piolit të dielën.
Mourinho e filloi konferencën e tij për shtyp me një dëshmi të karakterit të tij.
“Unë kam qenë këtu për dy vjet e pesë muaj dhe jam i vetmi person këtu që nuk kam humbur asnjë seancë stërvitore nga ajo kohë”, ka thënë fillimisht Mourinho për Tuttomercatoweb.
“Për mua nuk ka sëmundje apo humor të keq. Për dy vjet e gjysmë nuk kam bërë asgjë të keqe, madje as disa javë më parë kur të gjithë ishin të sëmurë”.
“Disa muaj më parë më duhej një ditë për një situatë që nuk kam pse ta shpjegoj. I thashë menaxherit Pinto dhe pronësinë dhe vendosëm që e nesërmja e derbit të ishte një ditë e lirë. Isha larg Romës për 15 orë. Më duket qesharake ta justifikosh këtë”.
“Nuk pranoj në asnjë mënyrë që të vihet në dyshim profesionalizmi dhe dinjiteti im, zemra për këtë punë. Nëse ka një shembull të përsosur profesionalizmi, jam unë. Nuk kam humbur asnjë ndeshje në mbi 20 vjet të karrierës sime”, përfundoi portugezi. /Telegrafi/
