Policia e Beratit ka proceduar penalisht tre persona në kuadër të masave për parandalimin dhe goditjen e krimeve mjedisore, si dhe të paligjshmërisë në fushën e mbrojtjes së territorit.
Një prej tyre u konstatua duke hedhur inerte me fadromë në shtratin e lumit Osum.
“Në kuadër të zbatimit të planit të masave për parandalimin dhe goditjen e krimeve mjedisore, si dhe në vijim të kontrollit të ushtruar për mbrojtjen e territorit, shërbimet e Policisë, në bashkëpunim me IMT Berat dhe Skrapar, kanë proceduar penalisht shtetasit: M. Sh., 53 vjeç, banues në fshatin Selan, Skrapar, pasi u konstatua në vendin e quajtur “Teteren”, duke hedhur inerte me një mjet fadromë në shtratin e lumit Osum.
F. D., 38 vjeç, banues në Poliçan, pasi gjatë kontrollit të ushtruar në fshatin Bogovë, Skrapar, ka rezultuar se kishte pushtuar një sipërfaqe toke dhe ushtronte aktivitetin tregtar duke mos paguar tatimet, taksat, dispononte mall pa faturë, si dhe kishte dy punonjës të pasiguruar.
S. L., 30 vjeç, pasi gjatë kontrollit u konstatua se kishte pushtuar një sipërfaqe toke publike dhe tregtonte pa faturë tatimore pllaka guri dekorativ, të cilët dyshohet të jenë nxjerrë në Malin e Tomorit”, tha Policia.
Policia e Shtetit paralajmëron se do të vijojë kontrollet dhe në këtë kuadër “kërkon bashkëpunimin e qytetarëve që të denoncojnë çdo rast të paligjshmërisë në Komisariatin Dixhital apo në numrin pa pagesë 112, duke siguruar anonimatin dhe reagim të paanshëm kundrejt shkelësve të ligjit”.
