Kanë përfunduar dy ndeshjet e fundi të xhiros së shtatë në Superligën e Kosovës.
Dukagjini ka regjistruar fitoren e parë në Superligë këtë sezon, duke e mposhtur skuadrën e Dritës me rezultat 2-1, gjersa Ulpiana ka ndalur me barazim skuadrën e Prishtinës.
Drita ishte në epërsi pas pjesës së parë me golin e Almir Ajzeraj në minutën e 39-të, megjithatë Dukagjini bën kthesën e madhe në pjesën e dytë.
Ahmed Januzi barazoi shifrat në minutën e 50-të, gjersa i sapo-inkuadruari, Chibueze realizoi golin e dytë për skuadrën e tij duke përmbysur rezultatin dhe arritur një fitore tejet të madhe.
Drita regjistron kështu humbjen e dytë radhazi në kampionat dhe mbetet në pozitën e pestë t me 11 pikë të mbledhura, gjersa Dukagjini e arrijnë fitoren e tyre të parë në kampionat duke u ngritur në pozitën e tetë me gjashtë pikë.
Në anën tjetër, Prishtina është ndalur nga skuadra e Ulpianës me rezultat 1-1.
“Kryeqytetasit” ishin në disavantazh pas përfundimit të pjesës së parë pasi Ermir Rrezi i dha epërsinë Ulpianës në minutën shtesë.
Në pjesën e dytë, vendasin u rikthyen shpejtë me një gol nga Leotrim Kryeziu në minutën e 53-të.
Prishtina kishte disa raste shënimi me anë të Otto John, megjithatë pa sukses, duke bërë kështu që epilogu final i takimit të mbyllet me barazim.
Prishtina ndalet pas tre fitoreve radhazi, gjersa Ulpiana “rrëmben” edhe një pikë të vlefshme, pas tre pikëve të fituara ndaj Gjilanit në fundjavën e kaluar.
“Kryeqytetasit” tani renditen në pozitën e gjashtë të tabelës me nëntë pikë të mbledhura pas shtatë xhirosh, gjersa Ulpiana gjendet në pozitën e parafundit me gjashtë pikë të mbledhura pas shtatë ndeshjeve.
