Tre persona janë dënuar sot me vdekje nga drejtësia jordaneze, pasi u shpallën fajtorë për sulmin ndaj një kishe ortodokse në Karak. Nga sulmi mbetën të vrarë 9 persona dhe u plagosën 25 të tjerë.
Në një deklaratë, ushtria jordaneze bëri të ditur se Gjykata e Sigurisë Shtetërore e dha vendimin këtë mëngjes për tre burrat që kryen sulmin më 23 tetor në zonën e Hammoud, në Karak.
Të lidhura
None found
Sipas deklaratës, ata u shpallën fajtorë për “akte terroriste që shkaktojnë vdekje”, “posedim armësh dhe municionesh me qëllim kryerjen e sulmeve” dhe “komplot për të kryer akte terroriste dhe për të promovuar idetë e një organizate terroriste”. Ushtria sqaroi se të dënuarit kanë të drejtë ta apelojnë vendimin në gjykatën më të lartë.
Sulmi, i cilësuar si i paprecedentë ndaj të krishterëve në Jordani, u krye nga tre persona të armatosur në fshatin Hamoud. Sipas policisë, ata hynë në territorin e Kishës Ortodokse Greke të Shën Gjergjit dhe qëlluan mbi besimtarët që po merrnin pjesë në një funeral. Më vonë, tre autorët u arrestuan në një shtëpi të braktisur në Karak.
Mbreti Abdullah II i Jordanisë e cilësoi ngjarjen si një “sulm terrorist”. Ai vizitoi të plagosurit dhe u zotua se autorët do të ndëshkoheshin “shumë rëndë”.
Në Karak, qytet me rreth 375,000 banorë, jeton një komunitet i madh i krishterë. Të krishterët përbëjnë rreth 3 përqind të popullsisë prej 11 milionë banorësh të Jordanisë.
