Ministri i Punëve të Brendshme, Xhelal Sveçla, është takuar sot me drejtorin e Europolit, Jürgen Ebner, në margjinat e Forumit Ministror BE-Ballkani Perëndimor për Drejtësinë, që po mbahet në Budvë të Malit të Zi.
Sveçla tha se Republika e Kosovës mbetet një partner serioz për Europolin dhe se bashkëpunimi, i mbështetur në marrëveshjet e nënshkruara deri më tani, po jep rezultate të vazhdueshme.
Të lidhura
None found
Në një postim në Facebook, ai shkroi se gjatë takimit u rikonfirmuan sukseset e operacioneve të përbashkëta kundër grupeve kriminale ndërkombëtare, të cilat rrezikojnë sigurinë e Kosovës, të rajonit dhe më gjerë.
Si dëshmi të përkushtimit dhe seriozitetit të Kosovës për të goditur çdo veprimtari kriminale, Sveçla përmendi operacionin e fundit, “Trado 3”, të zhvilluar më 3 nëntor të këtij viti. Operacioni u udhëhoq nga Europoli në koordinim me shtatë shtete evropiane, mes tyre edhe Kosova.
Ai përfundoi duke thënë se bashkëpunimi me Europolin do të thellohet, me synimin për të arritur rezultate të reja të përbashkëta kundër krimit të organizuar ndërkombëtar dhe për të forcuar sigurinë.
