Në emisionin “Ftesë në 5” u diskutua për bukurinë e grave ruse, ukrainase dhe shqiptare, si edhe për mënyrën se si kultura dhe moda ndikojnë te standardet estetike. Në bisedë morën pjesë stilisti Ardi Borova, gazetari në Rusi Misha Pumo dhe Oksana Subashi, agjente imobiliare ukrainase që jeton në Shqipëri.
Gjatë emisionit u paraqit një renditje e vendeve që konsiderohen se kanë gratë më të bukura në botë. Rusia zinte vendin e parë, pasuar nga Suedia dhe Ukraina. Në listë ishin edhe Polonia, Kolumbia, Brazili, Çekia, Meksika dhe Italia.
Të lidhura
None found
Ardi Borova vuri në dukje se Shqipëria mungonte në renditje. Për stilistin, ajo nuk është më pak e rëndësishme se Ukraina në këtë diskutim, pasi gratë shqiptare, sipas tij, janë të bukura si në pamje, ashtu edhe në shpirt.
Misha Pumo tregoi se e kishte vizituar Rusinë për herë të parë në vitin 1990. Nga përvoja e tij, gratë sllave, përfshirë rusët, ukrainaset dhe bjelloruset, dallohen për elegancën, tiparet e fytyrës dhe mënyrën si e mbajnë trupin gjatë jetës. Ai theksoi se bukuria varet nga këndvështrimi i secilit, por tha se shumë prej tyre kujdesen për trupin përmes gjimnastikës dhe sportit.
Gazetari vërejti gjithashtu se kozmetika dhe operacionet plastike po i bëjnë gratë në vende të ndryshme të ngjajnë gjithnjë e më shumë me njëra-tjetrën. Sipas tij, ndërhyrjet janë ana tjetër e përpjekjes për të qenë e bukur me çdo kusht dhe në Rusi ndonjëherë teprohet me to.
Duke krahasuar përshtypjet e tij ndër vite, Pumo tha se në vitin 1990 kishte parë më shumë bukuri natyrale sesa sot. Ai kujtoi se atëherë gratë i dukeshin më natyrale, më shpesh bionde dhe me sy bojëqielli, ndërsa më vonë pamja ndryshoi me përdorimin e ngjyrave të flokëve, kozmetikës dhe pigmenteve të ndryshme.
Sa i përket modës, Borova shpjegoi se në periudha të caktuara vihet në pah një tipar femëror, si vetullat e trasha, buzët me tul apo tipare të veçanta të fytyrës. Sipas tij, nuk ndryshojnë vetë parametrat, por modeli që bëhet i dëshiruar në një moment të caktuar.
Oksana Subashi foli për kulturën e kujdesit ndaj vetes në Ukrainë. Ajo theksoi se një grua kujdeset për trupin sepse dëshiron vetë, jo për t’i pëlqyer bashkëshortit apo dikujt tjetër. Sipas saj, kjo zgjedhje nuk varet nga fakti nëse është e martuar, ka lindur apo nga mosha që ka.
Pumo kundërshtoi përshtypjen se rusët dhe ukrainasit janë të ftohtë. Bazuar në takimet e tij me rusë dhe ukrainase, ai i përshkroi si njerëz të ndjeshëm, që lexojnë shumë dhe i kushtojnë rëndësi zhvillimit mendor krahas sportit. Ai tha se një bisedë e parë me një vajzë ruse apo sllave mund të përqendrohet te kultura, artet, gjërat e bukura e ndoshta poezia; për këtë arsye, sipas tij, dikush që dëshiron ta njohë duhet të bëjë përpjekje për t’i pëlqyer.
