Nathalia Gadelha, 20 vjeçe, është identifikuar si bashkëpilotja e avionit Learjet 60 që u rrëzua të dielën në Palm Beach të Floridës. Nga aksidenti humbën jetën të nëntë personat që ndodheshin në bord.
Nëna e saj, Camila, dhe njerku konfirmuan për The New York Post se Gadelha ishte pjesë e ekuipazhit të avionit që udhëtonte nga Austin, Teksas, drejt Bahamas. Sipas tyre, avioni humbi papritur lartësinë përpara se të rrëzohej në Palm Beach.
Të lidhura
None found
Regjistrimet e komunikimeve me kontrollin e trafikut ajror pasqyrojnë çastet para përplasjes. Në audio, Gadelha dëgjohet të thërrasë: “Shiko nga dritarja, Jeff!”, teksa paralajmëron për rrëzimin e avionit. Në të njëjtin regjistrim dëgjohet edhe një burrë duke u lutur.
Sipas raportimeve, avioni po zbriste me një shpejtësi prej më shumë se 20 mijë metrash në minutë. Ai u përplas në një park rimorkiosh, ku hapi një krater të madh dhe rrëzoi linjat e energjisë elektrike.
Gadelha ishte rritur në Palm Beach. Në vitin 2023, mediat lokale kishin raportuar për të pasi, në moshën 17-vjeçare, kishte marrë licencën e pilotit përpara patentës së drejtimit. Synimi i saj ishte të bëhej pilote në një linjë ajrore komerciale.
Trajnimin për pilotim e kishte nisur në vitin 2020. Kur u intervistua nga CBS12, ajo kishte përfunduar 88 orë fluturimi dhe kishte kaluar provimet teorike. Shpenzimet për licencën ia kishte mbuluar Akademia e Aviacionit e Distriktit Shkollor të Qarkut Palm Beach.
Në atë intervistë, Gadelha kishte thënë se i pëlqente të bënte gjëra ndryshe nga të tjerët: nuk dinte ende të drejtonte një makinë, por mund të pilotonte një avion.
Ajo ishte diplomuar në shkollën e mesme West Boca Raton dhe kishte përfunduar studimet në American Flyers, shkollë fluturimi me seli në Teksas dhe degë në Florida.
Në një prej postimeve të fundit në rrjetet sociale, 20-vjeçarja kishte ndarë një video nga një fluturim me partnerin e saj, Justin. Në mbishkrim shkruante se të dy ishin pilotë nën 21 vjeç dhe kishin licenca komerciale, si edhe licenca për avionë shumëmotorësh dhe fluturime instrumentale.
Autoritetet po vijojnë hetimet për të sqaruar shkakun e rrëzimit dhe rrethanat e sakta të aksidentit.
