Deputeti i LDK-së, Avdullah Hoti, ka deklaruar se Qeveria ka tejkaluar afatin ligjor për miratimin dhe dorëzimin në Kuvend të projektbuxhetit për vitin 2027. Ai i është referuar Ligjit për Menaxhimin e Financave Publike, i cili përcakton 31 tetorin si datën e fundit për paraqitjen e projektbuxhetit në Kuvend.
Sipas Hotit, më 1 nëntor projektbuxheti ende nuk ishte miratuar nga Qeveria, çka përbën shkelje të afatit të përcaktuar me ligj. Ai ka ngritur edhe pikëpyetje mbi mënyrën se si Kuvendi do ta shqyrtojë në procedurat parlamentare një dokument që dorëzohet pas përfundimit të afatit ligjor.
Të lidhura
None found
Hoti ka kritikuar qeverisjen e VV-së, duke thënë se shkeljet e ligjeve dhe të Kushtetutës janë kthyer në praktikë gjatë viteve të fundit.
Ai ka kujtuar se edhe në periudha zgjedhore, kur Qeveria ka qenë në detyrë, projektbuxheti është miratuar dhe dorëzuar në Kuvend brenda afateve dhe në përputhje me kërkesat ligjore.
Deputeti i LDK-së ka përmendur gjithashtu se dhjetëra ligje janë shpallur antikushtetuese nga Gjykata Kushtetuese. Sipas tij, Qeveria dhe Presidenca kanë shkelur në mënyrë të vazhdueshme Kushtetutën përmes shkarkimit ose mos-emërimit të zyrtarëve të lartë shtetërorë.
Hoti ka deklaruar se edhe legjislatura aktuale e Kuvendit të Kosovës është formuar përtej afatit kushtetues. Ai ka akuzuar kryeministrin se nuk u përgjigjet organeve të drejtësisë, ndërsa ka shtuar se kryeministri dhe ministrat kanë shkelur aktgjykimin e Gjykatës Supreme duke mbajtur njëkohësisht detyrën e anëtarit të Qeverisë dhe atë të deputetit.
Në reagimin e tij, Hoti ka theksuar se neni 22 i Ligjit për Menaxhimin e Financave Publike e detyron Qeverinë që projektbuxhetin për vitin e ardhshëm buxhetor t’ia dorëzojë Kuvendit jo më vonë se 31 tetor.
