Edon Zhegrova pritet të marrë minuta në sfidën e Juventusit kundër Napolit, edhe në rast se nuk përfshihet në formacionin titullar. Trajneri Luciano Spalletti ka bërë të ditur se sulmuesi kosovar do të aktivizohet gjatë takimit.
Juventusi vjen në këtë përballje pas një momenti të vështirë. Humbja 2-0 ndaj Genoas në mesjavë e ka lënë ekipin në vendin e nëntë të renditjes së Serie A. Përpara ndeshjes së së dielës, Spalletti u ka kërkuar lojtarëve të reagojnë dhe të shfaqin më shumë vendosmëri për të rikthyer rezultatet pozitive.
Të lidhura
None found
Tekniku italian u pyet edhe për ndryshimet e mundshme në formacion, përfshirë një start të Zhegrovës ose Jeremie Bogës. Nga përgjigjja e tij u kuptua se të dy futbollistët do të kenë mundësinë të luajnë në këtë duel.
“Edhe nëse nuk e nisin si titullarë, ata do të aktivizohen në pjesën e dytë”, deklaroi Spalletti.
Për Zhegrovën, kjo përbën një mundësi për të ndihmuar Juventusin në një ndeshje të rëndësishme. Bardhezinjtë kërkojnë të lënë pas humbjen e fundit dhe të mos distancohen më tej nga skuadrat që synojnë pozitat e kreut.
Spalletti ka theksuar gjithashtu se skuadra duhet të ketë ekuilibër, guxim dhe më shumë dëshirë për sukses sesa kundërshtari. Ai e ka cilësuar përballjen me Napolin si një sfidë jashtëzakonisht të vështirë.
“Na duhet një skuadër me ekuilibër, sepse do të jetë një ndeshje shumë e vështirë. Nuk duhet të kemi frikë në asnjë pjesë të fushës dhe do të kemi pak kohë për të sulmuar. Nuk do të ketë kohë për të folur”, u shpreh trajneri i Juventusit.
