Papa Leone XIV ka kërkuar të votojë në zgjedhjet afatmesme të së martës në Shtetet e Bashkuara, duke hapur mundësinë e një ngjarjeje të pazakontë në historinë e Kishës Katolike. Kreu i Vatikanit ka aplikuar për një fletë votimi që dërgohet me postë.
Robert Francis Prevost, 71 vjeç, i lindur në Çikago, figuron si votues i regjistruar në Illinois. Ai paraqiti kërkesën për votim me postë më 3 tetor.
Të lidhura
None found
Informacionin e bëri të ditur Kim Fladhammer, shefi i stafit në zyrën e sekretarit të qarkut Will. Ai i tha gazetës “Chicago Sun-Times” se Prevost është në listën e qytetarëve që kanë kërkuar fletë votimi për zgjedhjet e ardhshme.
Regjistrimi i Papës është bërë në adresën e të vëllait, në New Lenox, në jugperëndim të Çikagos. Në kohën kur u raportua lajmi, ai ende nuk kishte votuar.
Nëse Papa Leone merr pjesë në votim, do të ishte hera e parë në 2 000 vjet histori të Kishës Katolike që një Papë në detyrë voton në zgjedhjet e një shteti laik.
Leone XIV, i zgjedhur në maj të vitit 2025, është Papa i parë me origjinë amerikane. Përpara se të zgjidhej në krye të Vatikanit, ai kishte votuar në zgjedhjet paraprake të republikanëve dhe demokratëve, si edhe në zgjedhjet presidenciale amerikane të vitit 2024.
Zgjedhjet e këtij viti shihen si një provë e rëndësishme politike për administratën e Donald Trump. Në Illinois, vëmendja përqendrohet te gara për Senatin, pas largimit të senatorit demokrat Dick Durbin, te rizgjedhja e guvernatorit JB Pritzker dhe te përfaqësimi i distriktit të parë të shtetit në Kongresin amerikan.
Mundësia që Papa të votojë vjen mes përplasjeve të tij të hapura publike me presidentin Donald Trump. Leone ka kritikuar politikat amerikane të emigracionit, si dhe sulmet ushtarake amerikano-izraelite ndaj Iranit të 28 shkurtit. Në një meshë të së Dielës së Larit, në mars, ai e quajti bombardimin e Iranit një akt mizor dhe tha se Zoti nuk mund t’i pranojë lutjet e udhëheqësve me duart të mbushura me gjak.
“Unë nuk kam frikë nga administrata Trump dhe as të flas me zë të lartë për mesazhin e Ungjillit”, deklaroi Papa.
Trump, nga ana e tij, e ka cilësuar kreun e Kishës Katolike “të dobët” dhe “të tmerrshëm” në politikën e jashtme, si dhe e ka kritikuar për qëndrimet ndaj armëve bërthamore.
Leone u rrit në Dolton, pranë Çikagos, por tani jeton në Vatikan. Ligji amerikan u mundëson qytetarëve që jetojnë jashtë vendit të votojnë me postë në zgjedhjet e SHBA-së, përmes ligjit për votimin e shtetasve amerikanë jashtë vendit. Nëse voton, Papa Leo XIV do të përbënte një rast të veçantë në historinë moderne të papatit: një udhëheqës fetar me rol global që vazhdon të ushtrojë të drejtën e votës si qytetar amerikan.
