Regjistrimet e kamerave të sigurisë kanë dokumentuar daljen e fundit publike të Jennifer Symonds, 44 vjeçe, para se trupi i saj të gjendej pranë lumit Thames në Angli. Ajo ishte në shoqërinë e Nelio Gouveia, 45 vjeç, i cili ka pranuar në gjykatë se e vrau më 6 mars.
Sipas pamjeve të siguruara nga gazeta britanike “Daily Mail”, Symonds dhe Gouveia mbërritën rreth orës 21:15 në një restorant me kuzhinë mesdhetare në Henley-on-Thames, Oxfordshire. Takimi i tyre përfundoi pa u ulur në restorant, pasi kamerieri u tha se kuzhina ishte mbyllur.
Të lidhura
None found
Në video, Symonds ka veshur një pallto të gjatë të zezë, ndërsa Gouveia shihet pas saj, me xhaketë të zezë dhe xhinse të grisura. Pasi shkëmbejnë disa fjalë me kamerierin, 44-vjeçarja e falënderon me një lëvizje të dorës dhe del jashtë.
Ajo u gjet e vdekur në orën 07:50 të mëngjesit pasues, pranë lumit Thames, në territorin e klubit privat Phyllis Court. Vendi ndodhej rreth gjysmë milje larg restorantit ku ishte parë me Gouveian, dhe besohet se kjo ishte hera e fundit që Symonds u pa gjallë.
Raportimet bëjnë të ditur se më herët gjatë mbrëmjes ajo ishte takuar me Gouveian për të pirë diçka. Mes orës 02:00 dhe 03:00 të mëngjesit, pranë një pavijoni afër klubit u dëgjuan një zhurmë dhe një përplasje.
Gouveia, i cili dyshohet se kishte punuar si ndihmës kuzhinier në klubin privat, u arrestua në vendngjarje dhe u akuzua për vrasje. Në Gjykatën e Kurorës në Oxford ai pranoi fajësinë. Gjatë seancës së shkurtër, i veshur me uniformë burgu gri dhe me ndihmën e një përkthyesi të gjuhës portugeze, qëndroi me kokën ulur.
Gjykatësi Ian Pringle urdhëroi që Gouveia të mbahet në paraburgim. Seanca e radhës, në të cilën pritet të jepet dënimi, është caktuar për 20 nëntor.
Symonds kishte punuar për më shumë se gjashtë vjet në selinë britanike të Microsoft në Reading, si menaxhere e lartë e llogarive dhe marrëdhënieve me klientët. Ajo u largua nga kompania në janar të vitit 2025.
Një mik i saj tha se pas largimit nga Microsoft, 44-vjeçarja e kishte pasur të vështirë të gjente punë të re dhe po kalonte një periudhë të rënduar personale. Sipas tij, ajo ishte e shqetësuar edhe për një çështje gjyqësore të vitit të kaluar, në të cilën kishte akuzuar një ish-partner për sulm fizik; ai ishte shpallur i pafajshëm.
Miku e përshkroi Jenniferin si të dashur, zemërmirë dhe shumë të pëlqyer nga banorët e zonës, me të cilët ajo fliste shpesh. Ajo banonte në një apartament në katin e parë, mbi një sallon bukurie në qendër të Henley-on-Thames, vetëm tre minuta larg lumit.
Pas vdekjes, miqtë kërkuan që lulet përkujtimore të vendoseshin pranë një stoli në Red Lion Lawn, vend që Jennifer e quante të preferuarin e saj.
Inspektori Rob Underhill, nga Njësia e Krimeve të Rënda e Policisë së Thames Valley, shprehu ngushëllimet për familjen, që ka humbur një njeri të dashur. Ai i cilësoi veprimet e Gouveias si të rënda dhe tha se rasti pasqyron angazhimin e policisë për hetimin e dhunës ndaj grave dhe vajzave.
