Avokati Genc Gjokutaj ka komentuar zhvendosjen e Erion Veliajt nga burgu i Durrësit në institucionin penitenciar të Fierit, duke vënë në dyshim motivet e këtij vendimi dhe mënyrën e njoftimit të tij nga autoritetet.
Gjatë një interviste në emisionin “Prime News24” të News24, Gjokutaj tha se transferimi i personave të paraburgosur ose të dënuar zakonisht bëhet me kërkesën e tyre ose pasi është evidentuar një shkelje e rëndë.
Të lidhura
None found
Duke iu referuar zhvillimeve politike dhe protestave kundër qeverisë, avokati ngriti gjithashtu pikëpyetje për mënyrën se si kryeministri po reagon ndaj situatës së krijuar.
Sipas tij, zyrtarët që zbatojnë një urdhër të tillë mund të mos kenë mundësi ta kundërshtojnë atë. Gjokutaj pretendoi se cilësimi i çështjes si informacion sekret shërben për të shmangur dhënien e shpjegimeve lidhur me transferimin.
“Në pjesën dërrmuese të rasteve, transferimi kryhet me kërkesën e të paraburgosurit ose të dënuarit, ose kur provohet një shkelje e rëndë. Nëse ka një lidhje mes Gysit dhe Erionit, kjo mbetet për t’u parë. Në këtë histori janë tre personazhe: Erioni, Gysi dhe Edi. Dy prej tyre ndodhen brenda, ndërsa njëri është jashtë, ndaj duhet të presim se si do të zhvillohen ngjarjet. Nuk e dimë se si po ndikon protesta jashtë zyrës te psikika e kryeministrit dhe sa i kthjellët mund të jetë ai. Të tjerët thjesht firmosin dhe nuk mund t’i thonë jo, ndaj përdorin termin sekret. Por nuk ka sekret”, u shpreh ai.
