Pas zgjedhjeve në Serbi, ku Lista e Studentëve triumfoi përballë Alexandar Vuçiç, ka reaguar Elisa Spiropali. Deputetja socialiste deklaroi se rezultati i zgjedhjeve serbe, mund të sjellë mundësi të reja për Ballkanin.
Sipas saj, vullneti i qytetarëve ka fuqinë të ndryshojë edhe qeverisje që e konsiderojnë veten të pakohshme.
Të lidhura
None found
Reagimi i Spiropalit:
“Me votën e tyre, serbët shprehën në mënyrë masive kërkesën për ndryshim, duke i dhënë fund, ndoshta një herë e përgjithmonë, periudhës së dominimit politik të Aleksandër Vuçiç.
Zgjedhjet në Serbi dëshmuan edhe një herë se popujt kanë mundësinë dhe forcën për të ndryshuar kursin e vendit të tyre, edhe kur përballen me pushtete që synojnë të duken të përhershme.
Shpresoj që kjo zgjedhje të shënojë nisjen e një etape të re për demokracinë serbe dhe për bashkëpunimin rajonal.
Ajo që ndodhi në Serbi i hap Ballkanit një mundësi, vlerësimi i së cilës do të bëhet hap pas hapi, në varësi të veprimeve dhe reagimeve që do të vijnë. Siç ka nënvizuar kancelari Merz, mungesa e përparimit në normalizimin e marrëdhënieve mes Kosovës dhe Serbisë pengon zhvillimin e rajonit. Udhëheqësit e rinj kanë përpara tyre mundësinë të tregojnë se ndryshimi nënkupton edhe heqjen dorë nga mendësia shoviniste, vullnetin për dialog, zbatimin e marrëveshjeve dhe respektimin e sovranitetit të Kosovës.
Një urim të veçantë dua t’ua përcjell përfaqësuesve shqiptarë të Luginës së Preshevës, me shpresën se prania e tyre në parlament do të sjellë më shumë barazi, të drejta dhe mundësi për shqiptarët në Serbi.
Shqipëria ka interes për një Serbi demokratike dhe europiane. Ky orientim do të testohet nga mënyra se si pushteti i ri do t’u përgjigjet qytetarëve të tij dhe si do t’i zhvillojë marrëdhëniet me vendet fqinje. Me mbështetjen e BE-së dhe SHBA-së, kjo mundësi duhet të shndërrohet në veprime konkrete për ndërtimin e paqes së qëndrueshme, të cilën ua kemi borxh qytetarëve dhe brezit të ri të Ballkanit”, shkruan Spiropali.
