Sulmet e reja në Arabinë Saudite të mërkurën, më 21 tetor, lanë të paktën tre të vdekur dhe 10 të plagosur. Në shënjestër ishin Aeroporti Ndërkombëtar King Fahd, pranë qytetit të Dammamit, dhe një objekt në fushën e naftës Shaiba, në pjesën lindore të vendit.
Përballë përkeqësimit të sigurisë, Uashingtoni ka vendosur të largojë një pjesë të stafit diplomatik. Departamenti Amerikan i Shtetit ka urdhëruar që një pjesë e personelit të ambasadës amerikane në Riad dhe familjarët e tyre të largohen.
Të lidhura
None found
Për të ulur ekspozimin ndaj rreziqeve të sigurisë, në ambasadë do të vijojë të punojë vetëm personeli i vlerësuar si i domosdoshëm.
Autoriteti i Aviacionit Civil të Arabisë Saudite bëri të ditur se goditja në Aeroportin Ndërkombëtar King Fahd shkaktoi vdekjen e një personi dhe plagosjen e tetë të tjerëve. Nga autoritetet nuk janë publikuar hollësi të tjera për llojin e sulmit ose për dëmtimet në infrastrukturën e aeroportit.
Për dy viktimat e tjera dhe dy të plagosurit njoftoi Ministria Saudite e Energjisë. Ata u goditën nga mbetjet e një droni të interceptuar, i cili, sipas të dhënave paraprake, dyshohet se synonte një instalim në fushën e naftës Shaiba.
Ende nuk është përcaktuar nga autoritetet se kush qëndron pas këtyre sulmeve. Gjithashtu, mungojnë të dhëna të konfirmuara nëse ato kanë ndikuar në funksionimin e objekteve të naftës.
Arabia Saudite është përballur edhe me sulme të përsëritura, përgjegjësia për të cilat u është atribuar rebelëve Huthi në Jemen, që mbështeten nga Irani.
Goditjet e fundit kanë shtuar shqetësimin rreth mbrojtjes së infrastrukturës strategjike të mbretërisë, sidomos aeroporteve dhe objekteve të industrisë së naftës.
