Presidentja e Kosovës, Justina Shiroka-Pula, ka vënë në pah se Gjykata Kushtetuese duhet të veprojë e pavarur dhe se vendimet e saj duhen respektuar. Ajo tha se Kushtetuta qëndron mbi pushtetin dhe se institucionet, pa përjashtim, janë të detyruara t’i binden ligjit, raporton Ekonomia Online.
Gjatë ceremonisë për 17-vjetorin e themelimit të Gjykatës Kushtetuese të Kosovës, Shiroka-Pula e cilësoi pavarësinë e saj si një shtyllë të demokracisë, sundimit të ligjit dhe garantimit të të drejtave e lirive të qytetarëve.
Të lidhura
None found
Sipas presidentes, Kushtetuta vendos kufijtë e pushtetit dhe siguron që ai të mos jetë i pakufizuar, ndërsa të drejtat e qytetarëve të mos varen nga vullneti i zyrtarëve publikë. Ajo theksoi se pavarësia e Gjykatës Kushtetuese nuk është vetëm parim ligjor, por edhe garanci që Kushtetuta të mbrohet në praktikë, në çdo rrethanë dhe pa përjashtime. Gjykata ka përgjegjësi të veçantë në funksionimin demokratik të shtetit, në mënyrë që Kushtetuta të jetë autoriteti më i lartë juridik, të cilit i nënshtrohen të gjitha institucionet, deklaroi Shiroka-Pula.
Ajo nënvizoi se rëndësia e gjykatave të pavarura rritet në periudha krizash politike, kur institucionet janë nën presion dhe parimet kushtetuese vihen në provë. Në raste të tilla, ato sigurojnë që pushteti të ushtrohet brenda kufijve të përcaktuar nga Kushtetuta. Për Kosovën, si shtet i ri, Gjykata Kushtetuese ka rëndësi të posaçme dhe vendimet e saj duhet të respektohen, jo të personalizohen, pavarësisht pasojave politike.
Shiroka-Pula përmendi përvojën e Gjykatës Kushtetuese Federale të Gjermanisë dhe të gjykatave të tjera evropiane, si dhe ekspertizën e Komisionit të Venecias, si burime të vlefshme për shqyrtimin e sfidave të përbashkëta, zhvillimin e dialogut juridik dhe forcimin e standardeve që mbrojnë rendin kushtetues. Ajo shtoi se përvojat mund të ndryshojnë, por parimet janë të përbashkëta. Sipas saj, demokracia nuk matet me mungesën e kufizimeve të pushtetit, por me gatishmërinë për t’i respektuar ato: kur Kushtetuta është mbi pushtetin, të drejtat e qytetarëve janë më të sigurta dhe, kur institucionet i nënshtrohen asaj, demokracia bëhet më e fortë.
