Trajneri i Dinamos, Ilir Daja, ka festuar 60-vjetorin e lindjes në një mbrëmje ku mes të pranishmëve ishte edhe ish-drejtori i Partizanit, Olsi Rama. Gjatë festës, Rama ndau me të ftuarit një episod nga koha kur të dy punonin te Partizani, sipas “Top Channel”.
“Nuk kam ardhur si drejtor te Dinamo, ndaj nuk do ta largoj sërish Ilir Dajën”, u shpreh me humor Olsi Rama, duke shtuar se periudha e bashkëpunimit me të te Partizani ka qenë ndër më të bukurat e karrierës së tij.
Të lidhura
None found
Rama tregoi se në atë kohë Daja i kishte parashtruar disa kërkesa, por jo të gjitha kishin mundur të realizoheshin. “Më kërkoi disa gjëra dhe nuk arrita t’ia plotësoja të gjitha; ai e di mirë se për çfarë bëhet fjalë”, tha ai, duke theksuar se gjatë atij procesi marrëdhënia mes tyre u përmirësua ndjeshëm.
Ai nënvizoi gjithashtu se ish-lojtarët e Partizanit e kujtojnë me nostalgji dhe dashamirësi periudhën e Dajës në klub, edhe pas largimit të trajnerit.
Sipas Ramës, ndikimi i Ilir Dajës nuk kufizohet vetëm te rezultatet sportive. “Një nga gjërat më të rëndësishme në futboll është që lojtarët të përmirësohen. Ilir Daja ju ndihmon të bëheni futbollistë më të mirë, por edhe njerëz më të mirë”, deklaroi ai.
“Me punë, përkushtim dhe shumë sakrificë mund të arrini suksese në futboll, të fitoni trofe, por edhe të ndërtoni rezultate edhe më të rëndësishme në jetë”, përfundoi Olsi Rama.
