Partizani ka emëruar Mislav Karoglanin në krye të pankinës. Ish-tekniku i Ballkanit në Superligën e Kosovës u prezantua sot nga klubi i kuq përmes një njoftimi në rrjetet sociale. Për trajnerin kroat bëhet fjalë për një përgjegjësi të rëndësishme, pasi mbërrin në kryeqytet me misionin për të nxjerrë “Demat e Kuq” nga situata e vështirë.
Të lidhura
None found
Puna e Karoglanit te Partizani nis menjëherë, ndërsa debutimi i tij zyrtar në stol do të jetë ndaj Vorës, të dielën në orën 13:30. Emërimi i tij konfirmon gjithashtu prirjen e presidentit Gaz Demi për të zgjedhur trajnerë me eksperiencë në skuadra të vendeve të Ballkanit. I fundit që mori drejtimin e Partizanit ishte rumuni Florin Bratu.
Karoglan është 44 vjeç dhe e nisi karrierën te Hajduku i Splitit, ku fillimisht shërbeu si zëvendëstrajner. Qëndrimi i tij zgjati 3 muaj, ndërsa bilanci me skuadrën ishte befasues: 8 fitore dhe 4 barazime.
Eksperienca te Istra nuk shkoi sipas pritshmërive. Karoglan qëndroi vetëm tri javë në drejtimin e ekipit dhe u shkarkua pasi mori vetëm një pikë. Humbja 6-0 ndaj Rijekës rezultoi vendimtare për drejtuesit e klubit, të cilët vendosën t’i ndërpresin bashkëpunimin.
Në tetor të vitit 2023, kroati u rikthye te Hajduku i Splitit. Edhe pse ekipi ishte në garë për titullin, rezultatet në katër javët e fundit të kampionatit e zbehën situatën dhe sollën largimin e tij për herë të dytë.
Me Sheriff Tiraspolin në Moldavi, Karoglan pati një kapitull përgjithësisht pozitiv. Në 20 ndeshje, ai regjistroi 14 fitore dhe 6 barazime.
Një vit më parë, trajneri u transferua te Ballkani, ku zëvendësoi Orges Shehin. Nëse rezultatet nuk do ta kishin frenuar skuadrën në 5 javët e fundit të kampionatit, Karoglan do të kishte pasur mundësinë ta udhëhiqte atë drejt titullit.
Tashmë, mbi shpatullat e tij rëndon një sfidë edhe më e madhe. Ai duhet ta nxjerrë Partizanin nga momenti i vështirë, të rikthejë besimin në një grup të demotivuar dhe të ndërtojë projektin e tij duke bashkuar “copëzat” e skuadrës. Përballja me Vorën do të jetë ndalesa e parë dhe testi fillestar për trajnerin e ri të të kuqve.
