LSDM-ja deklaroi se OBRM-PDUKM, VLEN dhe ZNAM nuk arritën të siguronin kuorumin e nevojshëm për zhvillimin e punimeve të Kuvendit, çka solli ndërprerjen e seancës parlamentare.
Të lidhura
None found
Sipas partisë, ndonëse shumica qeverisëse përbëhet nga pothuajse 80 deputetë, ajo nuk ishte në gjendje të garantonte as praninë e nevojshme për vazhdimin e seancës.
LSDM-ja akuzoi deputetët e qeverisë se po refuzojnë nisma në interes të qytetarëve, përfshirë Ligjin për Pagën Minimale prej 600 eurosh dhe Ligjin për Mbështetjen e Fermerëve.
“Për qytetarët nuk ka mjete, ndërsa fonde ka vetëm për tendera kriminalë”, thuhet në reagimin e LSDM-së.
Partia sqaroi se deputetët e saj dhe të koalicionit nuk morën pjesë në seancë në shenjë proteste, pasi OBRM-PDUKM, VLEN dhe ZNAM votuan kundër projektligjit për mbështetje financiare të fermerëve.
LSDM-ja theksoi se qeveria fillimisht refuzoi ndihmën konkrete për fermerët dhe më pas nuk arriti të krijonte kushtet për vijimin e punës parlamentare.
“Sigurimi i kuorumit është detyrim i shumicës qeverisëse. Qytetarët i paguajnë deputetët që të punojnë, të miratojnë ligje dhe të trajtojnë problemet që i shqetësojnë ata”, thuhet në njoftim./Telegrafi
