Altin Krasniqi, i biri i Jakup Krasniqit, e ka çmuar vizitën që presidentja e Kosovës, Justina Shiroka Pula, u bëri familjeve të tyre.
Të lidhura
None found
Deputeti i Partisë Demokratike të Kosovës theksoi se kjo ishte ndër vizitat e para nga përfaqësues të institucioneve shtetërore që nga momenti kur Dhomat e Specializuara dhanë vendimin dënues.
Sipas tij, kjo vizitë mbart një peshë të veçantë për familjen, pasi tregon gatishmërinë e institucioneve për të mbrojtur trashëgiminë e luftës së Ushtrisë Çlirimtare të Kosovës.
“I shprehim mirënjohje presidentes për këtë vizitë, e cila është e para nga ndonjë përfaqësues i institucioneve në këto gjashtë vjet. Kjo ka një rëndësi të madhe për familjen, sepse dëshmon se institucionet janë të gatshme të kontribuojnë në mbrojtjen e luftës së UÇK-së”, deklaroi Krasniqi.
Ai shtoi se presidentja kishte theksuar se do të ndërmarrë çdo hap të mundshëm brenda kufijve ligjorë në shkallën e Apelit për lirimin e krerëve të UÇK-së.
“Presidentja ka bërë të qartë se çdo gjë që qëndron brenda kornizave ligjore do të mbështetet në procesin e Apelit”, tha Krasniqi.
Presidentja e Republikës së Kosovës, Justina Shiroka Pula, zhvilloi dje takime me familjet e Hashim Thaçit, Kadri Veselit, Rexhep Selimit dhe Jakup Krasniqit, ish-udhëheqësve të Ushtrisë Çlirimtare të Kosovës, të cilët ndodhen përballë procesit gjyqësor në Dhomat e Specializuara të Kosovës në Hagë.
Në njoftimin zyrtar thuhet se gjatë këtyre vizitave, Presidentja shprehu solidaritet me familjet, duke nënvizuar se bëhet fjalë për një periudhë të rëndë si për ta, ashtu edhe për Republikën e Kosovës.
