Një rast i rëndë po hetohet në Cutron, në provincën e Krotones, në Kalabri, ku një grua 60-vjeçare dhe djali i saj 28-vjeçar dyshohen se kanë vrarë Salvatore Giglion, 69 vjeç.
Të lidhura
None found
Gruaja kishte raportuar në shtator të vitit 2024 zhdukjen e bashkëshortit, shtatë ditë pasi ai ishte parë për herë të fundit. Autoritetet italiane dyshojnë se krimi ka ndodhur më 21 shtator 2024, datë që 60-vjeçarja e kishte deklaruar si ditën e zhdukjes së tij.
Përveç vrasjes, të dyshuarit përballen edhe me akuzën e fshehjes së kufomës. Sipas hetimeve, trupi mund të jetë hedhur në lumin Tacina, megjithatë kërkimet nuk kanë çuar ende në gjetjen e tij.
Çështja po drejtohet nga Prokuroria e Krotones. Me kërkesë të saj, gjykatësi i hetimeve paraprake vendosi që nëna dhe djali të qëndrojnë në paraburgim në burg.
Prokuroria dhe hetuesit e lidhin motivin e dyshuar me çështje ekonomike. Në vendimin gjyqësor thuhet se objektivi mund të ketë qenë eliminimi i një personi të cilësuar si “i bezdisshëm”, me të cilin të arrestuarit kishin një konflikt të thellë dhe që po shiste pasuritë e tij të paluajtshme.
Pas ngjarjes, nëna dhe djali dyshohet se janë përpjekur të çorientojnë hetimin. Autoritetet kanë evidentuar një denoncim të vonuar të zhdukjes, koordinim të versioneve që do t’u paraqiteshin hetuesve, blerjen e disa litrave zbardhues për pastrimin e vendit ku dyshohet se ndodhi krimi, si edhe deklarata që nuk përputheshin me njëra-tjetrën.
Karabinierët e RIS-it, së bashku me njësinë e zhytësve nga Messina, kanë zhvilluar kontrolle dhe kërkime për gjetjen e trupit, por operacionet deri tani kanë rezultuar pa sukses.
Gjatë marrjes në pyetje, 60-vjeçarja ka paraqitur një tablo tjetër të marrëdhënieve brenda familjes. Ajo e ka cilësuar jetën familjare si të padurueshme dhe bashkëshortin si një njeri jashtëzakonisht autoritar.
Ajo ka deklaruar se ndër vite kishte pësuar episode të rënda dhune në familje, të cilat nuk i kishte denoncuar. Sipas saj, burri e kishte lidhur në një karrige dhe e kishte goditur me elektricitet përmes kabllove të baterisë së makinës, madje edhe kur ajo ishte shtatzënë. Këto pretendime duhet të verifikohen gjatë hetimit.
Pavarësisht këtij versioni, autoritetet gjyqësore kanë çmuar se provat e mbledhura deri në këtë fazë e justifikojnë masën e paraburgimit ndaj të dyshuarve.
Prokuroria pretendon gjithashtu se gruaja kishte kërkuar disa herë në “Google” të dhëna për “teknikat më efektive të marrjes në pyetje” dhe për metodën e njohur si “polici i mirë, polici i keq”.
Hetuesit thonë se djali e kishte udhëzuar nënën se si të sillej gjatë marrjes në pyetje, duke i thënë: “Kur nuk di çfarë të përgjigjesh, nuk përgjigjesh… thua ‘nuk më kujtohet’… kaq”.
Hetimi vijon, ndërsa trupi i Salvatore Giglios nuk është gjetur ende. Akuzat ndaj nënës dhe djalit mbeten të dyshuara dhe do të duhet të provohen në procesin gjyqësor.
