Christa Gail Pike, 50 vjeçe, pritet të ekzekutohet me injeksion vdekjeprurës në Tennessee, në një rast që do ta bëjë atë gruan e parë të ekzekutuar në këtë shtet pas më shumë se 200 vitesh.
Të lidhura
None found
Pike u shpall fajtore dhe u dënua me vdekje për vrasjen e Colleen Slemmer, 19 vjeçe, e cila ishte shoqe e saj në një qendër trajnimi profesional në Knoxville. Krimi ndodhi në vitin 1995, kur Pike ishte 18 vjeçe.
Prokuroria deklaroi se Pike e kishte joshur Slemmerin në një zonë pyjore, ku më pas e sulmoi me një prerëse kartoni dhe një copë të madhe asfalti. Në vrasje mori pjesë edhe i dashuri i saj i atëhershëm, Tadaryl Shipp, i cili më vonë pranoi se kishte gdhendur një pentagram në trupin e viktimës. Shipp u dënua me burgim të përjetshëm, ndërsa Pike ishte e vetmja prej tyre që mori dënimin kapital.
Gruaja ka deklaruar se e ka pranuar fatin e saj dhe se ndodhet “në paqe” me të. Ajo ka thënë gjithashtu se nuk i trembet vdekjes, por se e shqetëson mënyra se si do të zhvillohet ekzekutimi.
Në një deklaratë, Pike mori përgjegjësinë për vrasjen, duke e përshkruar veten në atë periudhë si “një 18-vjeçare me probleme të shëndetit mendor”. Ajo ka rrëfyer edhe abuzimin e rëndë seksual që kishte pësuar gjatë fëmijërisë.
Pavarësisht se në shumë shtete amerikane të dënuarit me vdekje mund të kërkojnë ushqimin që duan për vaktin e fundit, Pike zgjodhi të mos kërkonte një të tillë.
May Martinez, nëna e Colleen Slemmer, ka thënë se ka pritur për dekada zbatimin e dënimit ndaj Pike. Ajo dhe bashkëshorti i saj kanë udhëtuar nga Florida për të qenë të pranishëm si dëshmitarë të ekzekutimit.
Gjykata Supreme e SHBA-së refuzoi të martën kërkesën e avokatëve të Pike për pezullimin e ekzekutimit. Para këtij vendimi, guvernatori i Tennessee, Bill Lee, kishte hedhur poshtë kërkesën për falje.
Çështja mori vëmendje të gjerë gjatë viteve ’90, kryesisht për shkak të pentagramit të gdhendur në trupin e Slemmerit. Ky element ndikoi në frikën për rituale satanike gjatë periudhës së njohur në SHBA si “paniku satanik”.
Të dhënat e cituara në raport tregojnë se, që prej rikthimit të ekzekutimeve në SHBA në vitin 1976, janë ekzekutuar 18 gra. Ato përbëjnë rreth 1% të numrit të përgjithshëm të ekzekutimeve.
