Zbulimi i trupave të nëntë grave në Ekurhuleni, në lindje të Johanesburgut, ka nxitur gjatë kësaj jave protesta dhe tubime përkujtimore në Afrikën e Jugut, duke e vendosur sërish në qendër të vëmendjes dhunën ndaj grave.
Të lidhura
None found
Nëntë trupat janë gjetur nga policia gjatë dy muajve të fundit. Autoritetet po verifikojnë nëse këto vrasje kanë lidhje mes tyre. Pjesa më e madhe e viktimave ishin në të 20-at dhe 30-at, ndërsa disa prej tyre u zbuluan pa rroba dhe me shenja që dyshohet se dëshmojnë sulme seksuale.
Në mëngjesin e së shtunës, dhjetëra qytetarë u bashkuan në Johanesburg në një vrapim përkujtimor kushtuar Elizabeth Moselakgomo, njërës prej grave të vrara. Ajo ishte raportuar e zhdukur pasi kishte dalë për të vrapuar, ndërsa trupi i saj u gjet disa ditë më pas.
Të pranishmit kishin veshur rroba të zeza, ndezën qirinj dhe shpalosën një banderolë ku shkruhej: “Mjaft. Ndaloni vrasjen e femrave.”
Rastet kanë shtuar përsëri zemërimin për dhunën me bazë gjinore në Afrikën e Jugut, fenomen që në vitin 2025 u klasifikua si katastrofë kombëtare. Sipas organizatave për mbrojtjen e të drejtave të grave, zotimet dhe veprimet e autoriteteve nuk kanë mundur të rrisin ndjenjën e sigurisë tek gratë.
Të enjten, presidenti Cyril Ramaphosa tha se shoqëria nuk mund ta pranojë si diçka normale këtë lloj dhune. Ai premtoi se autoritetet do t’i hetojnë plotësisht rastet.
Nga ana tjetër, organizatat e shoqërisë civile e akuzojnë policinë se përballet me mungesë burimesh dhe probleme korrupsioni. Aktivistët thonë se në vend zbardhet vetëm afërsisht një nga 10 vrasje.
Merlize Jogiat, përfaqësuese e organizatës “Women for Change”, kërkoi rishikimin e mënyrës së funksionimit të policisë. Sipas saj, nëntë gratë u gjetën vetëm falë shtimit të pranisë policore në atë zonë.
Aktivistet kanë kritikuar edhe rekomandimet e policisë që u kërkojnë grave të shtojnë masat e sigurisë kur dalin të vetme për të ecur ose për të vrapuar.
“Mos e vendosni më përgjegjësinë e sigurisë sonë mbi ne”, deklaroi organizata, duke nënvizuar se gratë nuk duhet ta ndërtojnë përditshmërinë e tyre nën frikën e dhunës.
