Zëvendëskryeministri dhe ministri i Transportit, Aleksandar Nikolloski, zhvilloi sot një takim pune me ushtruesen e detyrës së ambasadores së SHBA-së në Maqedoni, Nicole Varns.
Të lidhura
None found
Bisedimet u përqendruan te partneriteti ekonomik ndërmjet dy vendeve, si dhe te mbështetja amerikane për proceset reformuese në Maqedoni. Gjatë takimit u vlerësua se marrëdhëniet ekonomike janë në nivel të lartë, ndërsa shkëmbimi tregtar vijon të ketë prirje pozitive.
Nikolloski theksoi se politikat zhvillimore të Qeverisë synojnë nxitjen e rritjes ekonomike nëpërmjet zbatimit të projekteve kapitale, të cilat mundësojnë ndërlidhjen dhe integrimin rajonal.
Sipas tij, punimet për ndërtimin e autostradave në Korridoret 8 dhe 10-d po përparojnë me dinamikë të shkëlqyer dhe në përputhje me afatet e përcaktuara.
Të dy bashkëbiseduesit përshëndetën partneritetin strategjik ndërmjet Maqedonisë dhe SHBA-së, duke e cilësuar atë si garanci për stabilitetin e vendit dhe të rajonit.
Në përfundim u konstatua se raportet dypalëshe mes Maqedonisë dhe SHBA-së janë të shkëlqyera dhe se ekziston vullnet i fuqishëm për zgjerimin e bashkëpunimit në fushat me interes të përbashkët.
