Një zyrtar policor ka marrë lëndime të lehta dhe dy protestues janë vënë në pranga gjatë demonstratës së zhvilluar të mërkurën në Hagë. Incidenti ndodhi pasi një grup pjesëmarrësish tentoi të shkonte pranë selisë së Dhomave të Specializuara të Kosovës.
Të lidhura
None found
Policia holandeze bëri të ditur se tubimi, i lejuar nga autoritetet lokale, u mbajt në Malieveld. Megjithëse marshimi drejt Raamwegut nuk ishte autorizuar, një pjesë e protestuesve u nis drejt kësaj zone, ku ndodhen Dhomat e Specializuara të Kosovës, pas përfundimit të protestës rreth orës 12:00.
Njësia Mobile e Policisë vendosi një kordon për të bllokuar kalimin në drejtim të Raamwegut. Tensionet u rritën pasi një grup demonstruesish u përball me forcat e rendit, të cilat ndërhynë për shpërndarjen e tyre. Për një periudhë të shkurtër u përdorën topi i ujit dhe spreji, ndërsa policia deklaroi se situata u vu shpejt nën kontroll.
Sipas autoriteteve policore, gjatë përplasjes disa nga protestuesit ushtruan dhunë ndaj zyrtarëve dhe pajisjeve të policisë. Një polic u lëndua lehtë, ndërsa dy persona u arrestuan nën dyshimin për vandalizëm.
Ndërkohë, Dhomat e Specializuara në Hagë kanë bërë publik aktgjykimin për ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi.
Hashim Thaçi dhe Jakup Krasniqi janë dënuar secili me nga 25 vjet burgim, Kadri Veseli me 18 vjet, kurse Rexhep Selimi me 13 vjet burgim.
Dënimet e shqiptuara ndaj katër ish-krerëve të UÇK-së arrijnë gjithsej në 81 vjet burgim.
