Një koncept i ri i Stellantis synon të ndryshojë mënyrën e transportit urban të pakove: një furgon plotësisht elektrik dhe autonom, i cili nuk ka xham përpara, panel instrumentesh apo ulëse për pasagjerë.
Të lidhura
None found
Modeli mban emrin BOW, akronim për “Box On Wheels”, ose “Kuti mbi Rrota”, dhe është krijuar për të kryer shpërndarje në qytete pa pasur nevojë për drejtues. Automjeti u prezantua nga Stellantis Pro One gjatë panairit ndërkombëtar të transportit IAA Transportation, në Hannover të Gjermanisë, në bashkëpunim me UQI Robotics.
Sipas Stellantis, BOW nuk është ende një produkt për tregun, por një koncept eksperimental. Faza e parë e testeve të validimit pritet të zhvillohet në Evropë, ndërsa kompania nuk ka njoftuar një afat për nisjen e prodhimit në seri.
Heqja e kabinës, xhamit të përparmë dhe instrumenteve tradicionale e lë mjetin në thelb si një hapësirë ngarkese mbi rrota, e pajisur me bateri dhe sistem shtytës.
Qasja e Stellantis është e ndryshme nga ajo e furgonëve klasikë, të cilët projektohen fillimisht për drejtuesin dhe më pas përshtaten për transport mallrash. Te BOW, ngarkesa është vendosur në qendër të të gjithë projektimit.
Koncepti synon të shqyrtojë përdorimin e logjistikës autonome në zonat urbane, në hapësirat me emetime të ulëta dhe në ambiente të kontrolluara, përfshirë fabrikat, spitalet dhe aeroportet.
Këto lokacione ofrojnë kushte më të përshtatshme për zhvillimin e teknologjisë autonome, pasi kanë më pak rreziqe dhe situata të paparashikueshme krahasuar me rrugët e hapura të qyteteve.
Një pistë aeroporti ose një fabrikë paraqet një mjedis shumë më të parashikueshëm për një sistem pa drejtues sesa një qendër urbane ku lëvizin njëkohësisht çiklistë, këmbësorë, kamionë dhe automjete të parkuara.
Detajet teknike të BOW mbeten ende të pakta. Stellantis nuk ka publikuar të dhëna për madhësinë e baterisë, autonominë, kapacitetin e ngarkesës, fuqinë e motorit, sensorët apo nivelin e saktë të autonomisë së automjetit.
Një mungesë e tillë informacioni është e pazakontë edhe për një koncept, por tregon se projekti ndodhet ende në një etapë të hershme të zhvillimit.
BOW u shfaq në të njëjtin prezantim ku Stellantis Pro One paraqiti edhe Pro One NEXT, një sistem operativ për administrimin e flotave dhe rritjen e kohës së funksionimit të automjeteve, si dhe një furgon të ri komercial.
Për këtë arsye, BOW duket se është pjesë e një plani më të gjerë dhe jo vetëm një provë për një furgon autonom. Stellantis synon të lidhë automjetet pa drejtues me të dhënat e ndërlidhura, financimin, sigurimet dhe rrjetin e distributorëve, në mënyrë që flotat të kenë sa më pak ndërprerje në aktivitet.
Në kuadër të partneritetit, Stellantis ofron përvojën e saj në inxhinierinë dhe prodhimin e automjeteve, ndërsa UQI Robotics sjell teknologjinë dhe njohuritë në fushën e robotikës dhe autonomisë.
Ky bashkëpunim dëshmon gjithashtu se zhvillimi i automjeteve pa drejtues kërkon bashkimin e kapaciteteve të prodhuesve tradicionalë të automjeteve me ekspertizën e kompanive të specializuara në robotikë dhe inteligjencë autonome.
Për operatorët e flotave, BOW mbetet ende një projekt fillestar. Testet në kushte reale në Evropë do të tregojnë nëse “kuta mbi rrota” do të mbetet vetëm një demonstrim teknologjik apo do të shndërrohet në një mjet të përdorshëm për shpërndarjen e pakove.
Stellantis nuk ka përcaktuar ende një datë për prodhimin apo hedhjen në treg të BOW. /Telegrafi/
