Ministria e Drejtësisë ka zhvilluar mbledhjen e parë të Grupit Punues, të ngarkuar me hartimin e Strategjisë Kombëtare për Mbrojtjen nga Dhuna në Familje, Dhuna ndaj Grave dhe Dhuna me Bazë Gjinore për periudhën 2027–2031.
Të lidhura
None found
Seanca u drejtua nga zëvendëskryeministrja dhe ministrja në detyrë e Drejtësisë, Donika Gërvalla, e cila mban edhe postin e Koordinatores Kombëtare për Mbrojtje nga Dhuna në Familje, Dhuna ndaj Grave dhe Dhuna me Bazë Gjinore.
Gërvalla nënvizoi se dokumenti i ri strategjik duhet të përqendrohet te problemet konkrete dhe të propozojë veprime të vendosura për parandalimin dhe adresimin e dhunës.
“Për Strategjinë 2027–2031 duhet të jemi të guximshëm, duhet të adresojmë tema të cilat na duken sot që janë të vështira”, deklaroi ajo.
Sipas ministres në detyrë, pasojat e dhunës nuk kufizohen vetëm te gratë, por prekin edhe fëmijët dhe familjet. Për këtë arsye, ajo kërkoi një trajtim më të gjerë dhe gjithëpërfshirës të fenomenit.
Ajo u ndal edhe te shtimi i rasteve të raportuara të dhunës në familje, duke theksuar se kjo shifër nuk do të thotë medoemos se dhuna është rritur. Rritja mund të lidhet gjithashtu me fushatat e ndërgjegjësimit dhe me përfshirjen më aktive të institucioneve shtetërore.
Gërvalla veçoi kontributin e shoqërisë civile, organizatave dhe individëve, të cilët ndër vite kanë insistuar që institucionet ta trajtojnë këtë problem me seriozitet.
Në takimin e parë u shqyrtuan përfundimet e analizës së strategjisë në fuqi, krahas objektivave strategjike dhe specifike që synohet të pasqyrohen në dokumentin e ardhshëm.
Puna e Grupit Punues do të vijojë në mbledhjet e radhës, me qëllim përgatitjen e Strategjisë Kombëtare 2027–2031. Dokumenti pritet të forcojë politikat dhe mekanizmat institucionalë për parandalimin dhe trajtimin e dhunës, si dhe bashkëpunimin mes institucioneve.
